12 Otsaila 2014

Lekua, datak eta orduak ezaguturik, Alcobendaseko Amaya Valdemoro kiroldegian martxoaren 14tik 16ra bitartean burutuko den XXXV. edizioko Kopan egoteko bidaia antolatu du Erreka Laranja Peñak.
Bera Bera animatzeko intentzioarekin, berriro txapela lortze aldera, Erreka Laranjak autobusez prestatu duen bidaia honako hau da: martxoaren 15ean, larunbata, goizeko 6etan Bidebietatik irten –finalerdiak 13,30 etan eta 16etan izango dira- eta buelta igandean bazkaldu eta gero, finala 13etan izango baita.
Eta salneurriak, honakoak: autobusa, bazkideentzat, 15 euro; bazkide ez direnak, 25 euro. Hotela, Alcobendasen, logela bikoitzak gosaria barne, 50 euro (bi pertsonentzat) eta banakako gelak gosaria barne, 40 euro. Antza, Kopa abonamendua 11 eta 15 euroen artean egongo da eta partidako salneurria, zortzi eurokoa.
Informazio gehiago Erreka tabernan (943 397 996 Marian) edo honako emailean: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.
Otsailaren 25ean izango da zozketa Alcobendaseko udaletxean. Final-laurdenak ostiralean jokatuko dira; finalerdiak, larunbatean eta finala, igandean.

12 Otsaila 2014

2013ko irailaren 28a gogoratzeko moduko data izango da Maitane Etxeberria eta María Akuña jokalarientzat. Eskuin hegalak lehenengo taldearekin debuta egin zuelako eta atezainarentzat aurreneko deialdian sartu zelako Yamiley Rodríguezen lesioa zela eta. Barakaldoko Lasesarreko kiroldegian izan zen, Zuazoren aurrean, Bera Beraren hurrengo aurkaria (Bidebieta, larunbata 19etan). Ligako hirugarren jardunaldia zen. Beroketan María Akuña galduta zebilen, Maitane Etxeberriarentzat laugarren deialdia zen, Superkopako finalean eta Ligan A Guardan eta Bidebietan BM Rocasaren aurka izan ostean. Bigarren zatiaren erdia baino gehiago jokatu zela, Imanol Álvarezek markagailua estu zegoela (18-19) Maitane Etxeberria sartu zuen. Gazteak, orduan 16 urte, segituan erantzun zuen eskuin hegaletik gola sartuz (18-20) eta partida berak itxi zuen (20-25). Partida horren ostean, Maitane Etxeberria Ligako norgehiagoka bakarra galdu du, etxean azkenekoa, Mecalia Atlético Guardésen aurkakoa. Izan ere, klubeko kadete eta jubenil mailako Euskal Ligako taldeak ligari eusteko Maitane Etxeberriak jubenilekin jokatu zuen eta helburuak, Barakaldon gainera, gauzatu ziren. 2013ko abuztuaz geroztik, eskuin hegalekoak 35 partida jokatu ditu eta beste bost norgehiagoketan lau talde ezberdinetako deialdian sartu da. Espainiako jubenil mailako selekzioarekin Poloniako 17 urte azpiko Eurokopan izan zen abuztuan zuen, lehen urtekoa izan arren. Guztira sei partida, minutu asko eta 22 gol. Ohorezko mailako Bera Berarekin 12 norgehiagoka jokatu ditu 39 gol sartuta, Castelldefelsen izan ezik guztietan gol sartu du. Champions Leagueko partida guztiak jokatu ditu Podravkaren aurkako azken jardunaldian izan ezik, Larviken gol bat sartuz. Era berean, Verónica Valverdek zuzentzen duen jubenil mailako Bera Berarekin, taldeko partida erdiak jokatu ditu, zazpi. Eta urtarrilean Asturiasen Euskadiko selekzioarekin Espainiako lurraldeen arteko txapelketa jokatu zuen. Bost partidetan 24 gol sartu zituen (batean atsedena hartu zuen) eta brontzeko domina gol bakar batez ihes egin zien euskaldunei. Imanol Álvarez eta Martin Larrañaga entrenatzaileek Maitane Etxeberriari jai eman diote ia aste osoa, Asturiasetik etorri zenean bezala. María Akuña, 19 deialdi Bestalde, Maria Akuñaren egoera ez da hain pozgarria atezain lana betetzen duelako, ardura handiko postua, alegia. Halere, Barakaldoko ezohiko egoera gainditu zuen eta bere lana oso ondo bete du, datuak adierazten dutena baino garrantzitsuagoa dena. Bi penaltietan izan bazen ere, bere debuta 2013ko urriaren 2an izan zen Bidebietan BM Porriñoren aurrean. Baina Castelldefelsen erronka handiari heldu zion Maria Akuñak etorkizunaren islada. Lehenengo zati amaieran epaileek Ana Tempranori txartel gorria atera zioten kataluniar jokalari bat lurreratzeagatik. Ondorioz Akuñak bigarren zati osoa atea zaindu behar izan zuen markagailuan berdinketa izanik. Aldagelatik bueltan Bera Berak 0-6 partziala lortu zuen eta Maria Akuñak hiru geldiketa egin zituen, penalti bat eta guzti. Ondoren, taldeak ondo kudeatu zuen aldea partida irabazteko (24-30). Atezain gazteak Championsa gertutik bizitzeko aukera izan du baina debuta egin gabe. Lagunartekoetaz gain, María Akuñak minutuak izan ditu Bidebietan Valladolideko Aula Cultural taldearen aurrean (32-17), Etxebarri Kukullagaren aurka (15-40), Zumarragan burutu zen Euskadiko kopan –Zuazo eta Kukullaga aurkari- eta Cleba Leónen aurka. Ohorezko taldearekin izandako 19 deialdiaz gain, Liga eta Champions hartuta, Maria Graciak zuzentzen duen Bera Bera senior taldearekin sei partida jokatu ditu. Argazkia: Juan Antonio Garaikoetxea (Bera Bera vs Aula Cultural Valladolid)

11 Otsaila 2014

Kopako XXXV. edizioko egoitza Alcobendas izendatu ostean, gastuak murriztu aldera atseden eguna kentzeko proposamena luzatu zien klubei, adostasuna adierazi dutenek bidaia ostegunean egiteko baldintzarekin. Orain Federazioko Delegazio batzordeak onartu behar du Kopa hiru egunetara mugitzea, martxoaren 14ik 16ra bitatean, alegia.

Ezagutzera eman dena izan da zozketaren eguna, otsailaren 25ean izango da 18etan Alcobendaseko udaletxean. Zozketari begira, hirugarren urte jarraian, Bera Bera zerrendaburu izango da, oraingo honetan, Helvetia Alcobendaseki batera, izan ere, lehenengo itzuli amaieran lehenengo eta bigarrena izan zirenak.
Zozketan aterako diren aurreneko bi taldeen izenak zerrendaburuarenak izango dira, taulan lehen eta azken lekuan kokatuko direnak eta, ondorioz, balizko finalean baino elkar ez dute ikusiko. Donostiarrak eta madrildarrekin batera izango dira BM Rocasa, Mecalia Atlético Guardés, BM Porriño, Elche Mustang, Zuazo Barakaldo eta Mar Alicante.
Alcobendaseko Amaya Valdemoro kiroldegiak hartuko du Kopa, final-laurdenetan 12,30etan, 16etan, 18etan eta 20etan; finalerdiak, 13,30etan eta 16etan eta finala, igandean, 13etan.
Iazko otsailean Porriño, final-laurdenetan Bera Bera luzapena behar izan zuen Zuazo Barakaldo gainditzeko; finalerdietan Elche Mustang taldeari irabazi zion (23-20) eta hirugarren Kopa eskuratu zuen finalean BM Rocasaren aurrean (25-24).

11 Otsaila 2014

Urriaz geroztik ohorezko maila aztertzen ari da kirol psikologia arlotik. Amaia Oroz da, gasteiztarra, gaiari lotuta Masterra betetzen ari dena. Donostian psikologia ikasketak burutu zituen eta, horrez gain, kirolari lotuta egon da, izan ere saskibaloia egiten zuen ikasketei lehentasuna eman zien arte.
Praktikak egiterakoan, Amaia Orozek elite mailako talde baten lana gertutik ezagutu nahi du eta, gainera, bere ekarpena egin nahi die Imanol Álvarez eta Martin Larrañaga entrenatzaileei. Horrela helburu batzuk zehaztu zituen taldearekin, besteak beste, konzentrazio hobetze aldera, pistan gozatzeko asmoa eta abar.. eta horrez gain, jokalariekin helburu zehatzak ere bai.
Bera Berak hiru txapelketa lortu zituen iaz eta egun faboritoen artean dago Estatu mailako lehiaketa guztiak bereganatzeko. Amaia Orozek onartzen du “jokalariak jakin badakite txapeldunak direla eta horrek esan nahi duena”. Jokalari beterana eta gazteen artean dagoen aldeaz –Eli Pinedo eta Maitane Etxeberriaren artean, 16 urte daude- “jokalari bakoitzak duen papera barneratuta du” azpimarratzen du.
Horrela, etxeko partidetan eserlekuaren atzean kokatzen da eta “konzentrazio, jokalarien erreakzioak eta motibazioa hizpide, txosten batean entrenatzaileei luzatzen diet aztertu dezaten, guztia errendimendua hobetze aldera”.
Era berean, Verónica Cuñarekin hainbat saio egin ditu, izan ere, 15 hilabete daramatza partida ofizialik jokatu gabe eta kirolean eta eskubaloian murgiltzen hasi diren eskolako gazteei begira jokuen bidez baloreak eta arauak ezarri ditu. Eta bestetik, Masterreko amaiera lan bezala eskubaloi atezaina ditu aztergai, batez ere, aurrea hartzen dutenean, ondorioz, Ana Tempranoren lana aztertzen ari da zuzenean nahiz bideoak ikusten.