10 Azaroa 2013

Champions Leagueko multzoen fase honetako akaso partida zaileena zuen Bera Berak gaurkoan Mazedonian, bostgarren jardunaldia, Elcheren aurkako partida estua Ligan, bidaia luzea eta hiru baja garrantzitsu: Ana Martínez, Yamiley eta Cuña. Halere, Bera Bera ondo ekin dio partidari. Defentsan ohiko ardatza nagusia -Núñez, Elorza, Pinedo eta Menéndez-, Castro eta Dunay alboetan kokaturik. Israelídarra ezker hegalean kokatu da erasoan Pinedo alboetara bidaliz baina ia lehenengo zati osoa jokatu arren behin eta berriz Mazedoniaren defentsarekin topo egin du. Elorza eta Menéndezek asmatu dute baloiari abiadura emanez eta Bera Bera aurretik jarri da hamar minutuan (3-4) Castroren golari esker. Vardarrek asmatu du aurreneko transizioetan Khmyrova eta Djokic jokalarien bidez, baina Tempranok bi penalti gelditu ditu donostiarrak markagailuan eutsiz. Halere, baloiak galdu dira edo Leynaud atezainak aise gelditu dituen jaurtiketak Vardarren kontraerasoak eragin dituzte, ondo aprobetxatu dituenak. Eta, bestela, Khmyrova agertzen zen kanportik jaurtitzen edo Lekicen nagusitasuna. 7-1eko partziala azken 12 minutuetan eta Vardarren abantaila atsedenaldian pistan ikusi dena baino nabarmena zen (15-7). Bigarren zatian, Imanol Álvarezek Núñez eta Ederra piboteak jarri ditu erasoan, Menéndez eta Elorza lehenengo lerroan, Ziarsolok Pinedoren lekua hartu du -gero amurrikoa lehenengo lerroan kokatu da- eta Etxeberriak Castro ordezkatu du Tempranorekin talka egin duen arte. Jokaldi horretan epaileek partida gelditu dute baloia sareetara iritsi aurretik baina gola eman dute. Bigarren zati hasieran golak eman dira batean eta bestean, mazedoniarren eta donostiarren arteko tartea hamar goletan kokatuz. Bera Beraren minutu onenak iritsi dira orduan, piboteekin jokatuz, alboko jokalariekin eta kontraerasoak ikusi izan dira Ziarsolo eta Castroren bidez. Koprivnikan Prodavka Vegetaren porrotak, Larviken aurrean (19-24), Bera Berari Europan jarraitzeko aukera urria utzi dio. Horretarako, donostiarrek 12 goleko aldea lortu behar dute Donostiako Gaskan igandean (12,15etan). Halere, aurretik Valladolideko Aula Cultural Viveros Herol taldea Bidebietatik pasatuko da asteazkenean (19,30 h.). Fitxa: Vardar 30, Bera Bera 20. WHC Vardar 30 (15+15): Leynoud, Dembele (3), Lekic (2), Khmyrova (6), Fernández (2), Djokic (5) eta Radicevic (2)–titular- Nikolic, Suslina (o.a.), Zebic, Klikovic, Kostiukova (1) Crvenskoska (1p), Shteriova (2), Klikovac (2), Lojpur (3) eta Dmitrovic (1). Bera Bera 20 (7 + 13): Temprano, Castro (4), Menéndez (3), Elorza (2), Núñez (1), Dunay eta Pinedo (1) –titular- Ziarsolo (7, 4p), Arizaga (1), Ederra (1) eta Etxeberria. Deialdian sartu dira Ezkurdia, Arrojeria eta Akuña (o.a.). Epaileak: Cristina Nastase eta Simona Raluca Stancu (Errumania). EHFko delegatua: Tatjana Medved (Serbia). Kanporaketak: Fernández Vardaretik. Partzialak: 1-1, 3-4, 5-5, 7-5, 12-7, 15-7 –atsedenaldia- 19-9, 21-10, 23-12, 25-14, 28-18 eta 30-20.

09 Azaroa 2013

2013. urteko azken bidai luzea. Bera Bera Eskubaloiako gaur Bilbo, Munich, Sofia eta Skopje lotuko ditu Champions Leagueko multzoen faseko bostgarren jardunaldiari ekiteko. Aurrean, WHC Vardar aberatsa, Mazedoniako txapelduna eta Gaskan ikusi zen moduan izarrez betetako taldea. Cristina Nastase eta Simona Raluca errumaniarrek zuzenduko duten partida igandean (18etan) jokatuko da Skopjeko Boris Trajkovski kiroldegian.
Donotian, Vardarrek garaipena eskuratzeko sufritu behar izan zuen. Andrea Lekic jokalariak ardura hartu behar izan zuen azken minutuetan eta Vardarrek bi puntuak poltsikoratu zituen (19-23).
Donostiako partidaz geroztik Vardarrek hobetu egin du bere jokoa. Etxean Larviken aurkako norgehiagoka irauli ostean Nora Mörk jokalariak berdindu zuen segunduak falta zirela (27-27).
Eta hortik aurrera ez du kupidarik izan Pradavka Vegeta taldearekin. Skopje hirian 39 gol lortu zituen (Radicevic, 8; Lekic eta Zebic, 7) hamahiru goleko aldeaz irabazteko eta lehengo igandean Koprinivkan aldea handitu egin zuen (17-35). Vardar eta Larvik Main Round fasea jokatzeko txartela aterata, multzoko lidergoa jokoan dute, orain Skopjen dagoena eta, antza, datorren larunbatean Norvegian jokoan izango dena.
Elche Mustang taldearen aurka intentsita handiko partida ostean iritsiko da Mazedoniara Bera Bera. Arlo positiboan: bi puntu garrantzitsuak eskuraturik, Ligan sendo eta lidergoan aldea handituz; kontutan hartzeko, aldiz, Núñez, Elorza edo Pinedo bezalako jokalariak ia partida osoa jokatu zutela ostegunean, bajen, norgehiagoka sorta –igandekoa 14. izango da bi hilabetetan- eta bidaien eragina antzematen dela taldean.
Eta gainera, taldeak Championsen defentsan ematen ari den mailari eutsi nahi diola, helburua ikasten jarraitzea bada ere. Era berean, Valladolideko Aula Cultura taldearen aurkako partidara ahalik eta ondoen iristea da asmoa (Bidebietan, asteazkena 19,30etan) eta Europako maila goreneko txapelketa garaipen batekin itxi azaroaren 17an, igandean Gaskan. Oraingoz, partida hori oraindik ez dago entrenatzaile eta jokalarien buruan.
Vardarren aurkako partida EHF TV ikus daiteke igandean, 18etan.

08 Azaroa 2013

Harrobi gazteena lehiaketara itzuliko da. Lurralde mailako kadete taldeak Urnietan 17etan jokatuko du Urnieta Bosteko Jatetxea taldearen aurrean. Euskal Ligan, jubenilak kadeteak baino lehenago. Bera Bera jubenil 15,45etan arituko da Elgoibarren Astigarraga Gys Sport Elgoibar taldearen aurka eta 17,30etan Bera Bera kadete taldearen txanda izango da Tecnifuelle Elgoibarren aurrean. Eta igande eguardian Bidebietan (12etan) –adi Behobia pasatuko da eta!- Bera Bera senior taldeak Ereintza hartuko du.

07 Azaroa 2013

Bera Bera Eskubaloiak erronka zailenak gustoko ditu baina gaurkoa sekulakoa izan da. Bidebietako markagailuak 2-10 adierazi du 18. Minutuan. Bera Berak ez du erasoan asmatu, baloiak galdu ditu Elche Mustang taldearen kontraerasoak baliatuz eta ordurako Imanol Álvarezek eskatu ditu bi hutsarteak. Ermuko entrenatzaileak ez du ezer gorde gaurkoan.Núñez, Elorza, Pinedo eta Menéndez erdian, Etxeberria eta Ziarsolo alboetan, Dunayk kapitaina ordezkatu du erasoan. Elche Mustang taldeak Gómez, Requena, Sempere eta Musons jarri ditu erdian, Vila eta Gutiérrez alboetan eta Anna Pi piboteak Gómez ordezkartzen zuen erasoan, Sempere eskuin hegalean kokatuz. Elxetarren defentsak emaitzak eman dizkio. Zortzi minuetan Bera Berak bi jaurtiketa egin ditu, Pinedoren kontraeraso bat Trigueros atezainak gelditu duena –olinpikoak ez du gehiago huts egin- eta Dunayren jaurtiketa bat. Ziarsolok lehenengo gola sartu du 10. minutua pasaturik, baina berak langara bidali duen penaltia eta ondoren kanporatua izanda, aukerak aprobetxatu ditu Elchek Sempere, Jennifer Gutierrez eta Ivet Musonsen aldetik (18. min 2-10) jartzeko. Hortik aurrera partida aldatu egin da. Imanol Álvarezek bi piboteak jarri ditu pistan, Ziarsolok sekulako gola sartu du eskuin albotik eta Tempranoren geldiketa batek norgehiagokan kokatu ditu donostiarrak. Defentsan intentsitatea igoz korrika egitean asmatu dute, batez ere Eli Pinedok, ardura hartu duen jokalaria, zazpi metroetatik barne. Azken 12 minutuetan Elchek bi gol baino ez ditu sartu, ondorioz, Bera Bera atsedenaldian gertu zegoen (9-12). Ekaitzatik onik atera da Bera Bera. Eta bigarren zatiari konfidantzaz ekin dio. Maitane Etxeberriak gola sartu du hasi eta berehala, ondoren hegalean jarri da Castrori eskuin albokoa utziz. Pinedoren kontraeraso batek gol batera utzi du Bera Bera baina pasiboren arriskuaz zegoela Ivet Musons jokalariak gola sartu du. Tempranok Gutierrezen aurrean geldiketa bikaina egin du, Pinedok 13-13 ezarri du ondoren bere taldea aurretik jarri du, hau da, 12-3 partziala lortu du Bera Berak. Hortik aurrera zazpi berdinketa eman dira, 13tik 20ra. Musons ordezkaturik, Mamen Rodríguezek ardura hartu du erasoan eta penaltiak lortzen –guztira hamaika bota ditu Elchek- gipuzkoarrak estu hartu ditu, izan ere, Bera Berak ez ditu bi goleko abantailarik izan. Pinedok, penaltiz, 21-20 ezarri du lau minutu falta zirela. Ana Tempranok urrundu du Mamen Rodríguezen jaurtiketak eta beste atean, Guilabertek oso geldiketa ona egin dio Menéndezi. Azken minutuan, protagonista berak. Ziarsolok baloia lapurtu du 56 segundu falta zirela, Bera Berak segunduak urratu nahi zituen eta Menéndezen jaurtiketak Guilabertek urrundu du. Hiru segundo falta zirela Mamen Rodríguezek berdinketa izan du baina Ana Tempranorekin topo egin du. Oso garaipen garrantzitsua Bera Berarentzat. Atzo Rocasak A Guardan galdu zuenez, bigarrena sailkapenean partida bat baino gehiagora du orain. Larunbatean Mazedoniara bidaia Vardar taldearen aurka igandean 18etan jokatzeko. Fitxa: Bera Bera 21, Elche Mustang 20 Bera Bera 21(9+12): Temprano, Etxeberria (1), Pinedo (12, 6p), Elorza (2), Núñez (2), Menéndez eta Ziarsolo (3) –titular- Dunay, Ederra, Castro (1) y Arizaga. Deialdia osatu dute Arrojeria, Ezkurdia eta Akuña (o.a.). Elche Mustang 20 (12 + 8): Trigueros, Gutiérrez (1), Musons (8, 4p), Requena, Sempere (3, 1p), Pi (1) y Vila - titular- Gómez (1), Mamen Rodríguez (6, 5p), Mujika, Andreu, Fuentes, Martínez eta Guilabert (o.a.). Epaileak: Juanjo Gude eta Carlos Gude (EAE). Kanporatuak: Menéndez (2), Ziarsolo, Elorza eta Núñez (2) Bera Beratik eta Gómez, Requena eta Sempere Elche Mustangetik. Partzialak: 0-2, 0-5, 2-7, 4-10, 7-11, 9-12 –atsedenaldia- 12-13, 14-15, 17-16, 19-19, 20-19 eta 21-20.