O Porriñon irabazita, Bera Berak Bidebietan Jofemesa Oviedo hartuko du bihar (19etan, Carlos Gude eta Juan José Gude, euskaldunak), Loterías Ligako 23, jardunaldiari dagokion partidan. Donostiarren helburua da norgehiagoka irabaztea eta bide batez Rocasa estutzea, izan ere, Ligako partidari datorren asteazkenean ekingo diote Alcobendasen. Rocasak bihar lau goleko abantaila defendatuko du etxean Turkiako Kastanomu taldearen aurrean Challengeko finalean. Donostiarren zein kanariarren akats txikienak erabakiko du aurtengo Liga.
Aitzitik, Jofemesa Oviedo mailari eusten saitatuko da oso zaila izan arren. Aiala Zarautz behin jaitsita, lau partiden faltan, Oviedokoek zazpi puntu irauli behar diote Elche Mustang taldeari.
Biharko, Puchek deialdi bera prestatu du, hau da, Porriñora joan zen taldea. Alicia Fernándezen partaidetza kolokan dago orkatila bihurritu duelako eta Eider Lizarbek ere mina hartu zuen. Matxalen Ziarsolo kapitaina pistan entrenatu da baina oraindik ez dago minutuak jokatzeko moduan.
Harrobiko taldeek sei partida jokatuko dituzte asteburu honetan, izan ere, kadete mutilen eta senior nesken taldeek atsedena hartuko baitute. Larunbatean, Loterías Ligako Bera Berak Jofemesa Oviedo Bidebietan (19etan) hartu aurretik, 13,15etan infantil nesken mailan Bera Berak Hernani ET izango du aurrean Foru Aldundia txapelketan eta Gipuzkoako Kopan, 16etan, Bera Bera kadete nesken taldeak Ereintza A hartuko du.
Bihar larunbata, Bera Bera Bi infantil nesken taldeak Zumaiara egingo du bidaia eta 10,15etan Lubaki kiroldegian Brakis Pulpo izango du zain. Maila berean, 12,15etan Oñatin Aloña Mendik Bera Bera Bat hartuko du.
Igandean, berriz, Bera Bera infantil mutilen taldea Yoldin arituko da Egiaren aurka 9,30etatik aurrera.
Apirilean etxerako lanak egin ostean, Telden lortutako garaipena medio, Bera Berak Rocasa harrapatu zuen lidergoan eta adina puntu izan arren, gol average delakoari esker gipuzkoarrak dira aurretik. Maiatzean, Loterías Ligari amaiera jarriko diote azkeneko lau jardunaldietan.
Bera Berak larunbatean Bidebietan (19etan) Jofemesa Oviedo hartuko du, mailari eusteko lanak izango dituen taldea, izan ere, zortzi puntu jokoan direnean Elche Mustang taldea zazpi puntura du.
Horren ostean, Bera Berak bi partida jarraian izango ditu etxetik kanpo. Maiatzaren 14an, 19etan, Lasesarren Prosetecnisa Zuazo Barakaldo izango du aurrean, Kopako finaleko aurkaria. Hurrengo jardunaldian, Leonen jokatuko du Bera Berak ordutegi bateratuan (19etan), Carobels Clebaren aurka, non azkeneko bi denboraldietan berdinketa baino ez duen lortu, hori bai, helburuak behin lortuta. Denboraldiari amaiera Bidebietan maiatzaren 28an (19etan) Helvetia Alcobendasen aurrean.
Bestetik, maiatzaren 11ra arte atzeratuko du Rocasak 23. Jardunaldia, Challenge Cupeko finaleko itzulera partidari larunbatean ekingo diolako, Turkiako Kastamonu taldearen aurrean eta lau goleko abantailarekin. Kanariarrek Alcobendasen zain izango dute Helvetia (20etan).
Horren ostean, Telden Canyamelar Valencia hartuko dute, Granollersera egingo dute bidaia eta Clínicas Rincón Málaga taldearen aurka Ligari amaiera jarriko diote.
Bera Berak eta Rocasak Loterías Ligan ibilbide bera burutu dutenez, A Guardan galduta eta norgehiagoka zuzenak kanpoko taldearen aldekoa, edozein akats erabakiorra izango da Liga eskuratzeko.
Bera Berako harrobiko taldeek jokaturiko zazpi partideetatik, bost garaipen eta bi porotak. Senior mailako Gipuzkoako Kopan, Bera Berak gol bakar batez irabaztea lortu zuen Errenterian Ereintza Barymont taldearen aurka (26-27).
Bestetik, kadete mailan, neskek garaipena lortu zuten Elgoibarren Astigarraga Gys (23-25) taldearen aurka eta mutilak 30-19 nagusi Legazpiko La Salleren aurrean Bidebietan jokaturiko partidan.
Infantil mailan, mutilek 33-28 irabazi zioten Udarregi B Usurbil taldeari eta nesketan, Bera Bera Bat taldeak 12-20 galdu zuen Urnieta Kamox Precision Machining taldearen aurka, Bera Bera Bik 7-23 Aiala Arekin eta garaipena Bera Bera Hiruk lortu zuen Bergaran (6-32).
Kopako XXXVII edizioa ez ezik ligako bi puntuak ere bereganatzeaz gain, Bera Berak O Porriñon historiako 21.000 eta Ligako 17.000 gol kopuruak gainditu ditu. Datu hauek Juan Carlos Elorza kazetariak bildu zituen eta bertan Liga, Kopa, Superkopa eta Europako lehiaketak kontutan jasotzen ditu.
Kasualitatez, Ana Martínez izan da 21.000 gola eta 17.000 gola egin duen jokalaria. Aurrena, Kopako finalean izan zen, Zuazoren aurrean, 2-3 ezarri zuen elxetarrak markagailuan 4. minutura iritsi aurretik. Kopan, gainera, 1.500 gol kopurura iristeko gol bakarra falta zitzaion. Eta lehengo larunbatean, O Porriñon berriro, Ana Martínezek penaltiz sartutako gol batekin, 1-4 markagailuan, Bera Berako 17.000 gola ligan suposatu zuen.
Gol bitxi hauen zerrendan sartu da Ana Martínez. Bertan dira Libe Altuna (historiako 17.000), Eli Pinedo (18.000), Patri Elorza (19.000) eta Maitane Etxeberria (20.000). Eta Ligan Pinedok egin zuen 14.000., Etxeberria 15.000, eta Ederra 16.000.
