20 Abuztua 2016

Frantziako Celles sur Belle herriko lagunarteko txapelketa irekitzeaz gain, Super Amara Bera Berak aurredenboraldiko aurreneko partida jokatu du eta Montse Puchek zuzentzen dituen jokalariek bertako taldea gaindutu dute 26-29. Bihar, 19etan, aurkaria Tourseko Chambray izango da, bi talde hauek Frantziako goi mailara igotzea lortu dutenez, norgehiagoka hauek prestaketarako aproposak dira gipuzkoarrentzat.
Super Amara Bera Berak aurrean zuen Celles su Belle taldearen errodaje maila handia zenez, intentsitate handiko partida izan da. Halere, gipuzkoarrek ondo heldu diote lehiari, defentsan sakon handiarekin eta erasoan abiadura erabiliz. Ondorioz, atsedenaldian aurretik ziren donostiarrek (14-16). Puchek 12 jokalari eraman ditu eta egonaldi honetako helburu nagusia minutua pilatzea da.
Bigarren zatian, Super Amara Bera Berak erritmoari eutsi dio eta norgehiagoka irabaztea lortu du.

18 Abuztua 2016

Leire Aramendia bere aurreneko denboraldia betetzen ari da Super Amara Bera Berarekin. Taldeko lehenengo fitxaketa izan zen ezker hegalekoa indartzeko eta aurrendoraldiari errepasoa jo dio, arlo fisikoak lehentasuna hartzen duen une honi. “Tokatzen zaiguna da, fisikoa landu korrika eta korrika egin behar dugu eta” dio nafarrak.
Leringo jokalariak halere “harrituta dago taldeak daraman erritmoarekin entrenatzen hain denbora gutxi eramanda. Hemen dena da azkarra, intentsitate handikoa eta egia esanda oso gustora nago entrenaldiekin”. Aramendiak “Madrilgo bero itogarria” aldatu du “hemengo hezetasun itogarriagatik” eta azaldu duen bezala “entrenaldiak ere ezberdinak dira, Alcobendasen denbora gehiago ematen genuen baina hemen gimnasio lana beste era batera lantzen da, teknika eta taknikaz aparte. Beste lan eredua da”.
Taldeari nola moldatu den galdetuta, “oso ondo” erantzun du, “batzuk ezagutzen nituen eta Unibertsitate mailako Mundialean ere batzuekin egon nintzen eta oso ondo hartu naute”. Izan ere, “lehenengo bidaian elkar egoteko irrikan nago”.
Super Amara Bera Berak atzo egin zuen bidaia Frantziara eta gaur bere lehenengo saioa burutu du Celles sur Bellen. Ia hiru asteko “saio gogorrak pasatu ostean, entrenaldi karga handiarekin”, Aramendiak onartu du “lehiatzeko irrikan gaude”. Iaz bezala, Super Amara Bera Bera Celles sur Belleko txapelketan parte hartuko du Tourseko Chambray eta bertako taldearekin, Frantziako elite mailara igotzea lortu dutenak.
Nafarrak jakin badaki “lagunartekoak hasteko aurkari gogorrak dira”. Eta jakinaren gainean jarri dute taldekideek “esan didatenez oso talde fisikoak dira, intentsitate handiko partidak dira baina oso ondo datozkigunak aurredenboraldia osatzeko eta non gauden ikusteko”.
Taldeko jokuaz dio “oraingoz ondo, jokua ez da hain zaila eta batez ere arlo fisikoa lantzen ari gara”.

17 Abuztua 2016

Super Amara Bera Berak hiru asteko entrenaldi saio beteko ditu aurreneko lagunartekoak jokatu aurretik. Celles sur Bellen izango da, iaz bezala, Frantziako herri honetako txapelketan parte hartuz, aurten hiru talde elkartur direlarik, bertakoa, Tourseko Chambray eta Super Amara Bera Bera. Frantziako elitera iritsi diren bi taldeak izango dute aurrez aurre Montse Pucheren jokalariek, hortaz, maila handiko froga izango dira. Horretarako, entrenatzaileak lehenengo plantillako hamabi jokalari eramango ditu Frantziara: Temprano, Zugarrondo, Menéndez, Arrojeria, Martínez, Ezkurdia, Etxeberria, Ederra, Fernández, Sans, Múgica eta Aramendia. Donostian geldituko da Zaldua lan berezia eginez. Eta Eider Rubiorekin entrenatuko dira aurredenboraldia burutzen ari diren Lizarbe, Husillos, Errekondo, Odriozola, Ainhoa Etxeberria, Encina eta Berasategi. Super Amara Bera Bera gaur abiatu da Autocares Davidekin. Bihar Celles sur Belle herrian entrenatuko da eta ostiral eta larunbatean 20etan izango ditu norgehiagokak, lehenengo partidan bertako taldea izango du aurrean eta larunbatean Chambray, Nely Carla gipuzkoarraren datorren denboraldiko taldea. Super Amara Bera Bera Donostiara itzuliko da bigarren partida amaitu ostean. Igandean atsedena hartuko du eta hurrengo astean Egiako txapelketari ekingo dio, aurten bi jardunaldietan burutuko dena. Ostegunean, hilak 25, Bidebietan Super Amara Bera Berak Prosetecnisa Zuazo Barakaldo hartuko du eta Helvetia Alcobendasek Celles sur Belle izango du aurkari. Larunbat goizean Egian, hirugarren eta laugarren postua eta finala.

30 Uztaila 2016

Espainiako eskubaloi Federazion egindako zozketaren arabera, Super Amara Bera Berari Bidebietan Aula Valladolid taldearekin hastea egokitu zaio Loterías Ligako 2016-17 denboraldia, maiatzaren 27an Leonen amaituko duelarik. Txapeldunen ligako atarikoarekin bat egiten duenez –irailak 9 eta 10 Donostian burutuko dena-, Super Amara Bera Berak aurreratu edo atzeratu beharko du ligako lehenengo partida.
Hortik aurrera Mediterraneoko hiru aurkariak izango ditu jarraian: Elche Mustang, Canyamelar Valencia etxean hartuko du eta Granollersera egingo du bidaia urriaren 1ean. Urriaren 15ean astebeteko etenaldi ostean Málagako taldea agertuko da Bidebietan, orain Rincón Fertilidad deiturikoa eta horren ostean igo berri direnak urriaren 22an Super Amara Bera Berak Gijónen Mavi Nuevas Tecnologías izango du aurrean eta astebete beranduago Bidebietan debutari izango dira BM Base Villaverde madrildarrak.
Azaroan egutegia zailagoa da gipuzkoarrentzat, Loterías Ligako lehenengo faseari amaiera jartzeko, izan ere, Alcobendasen eta Porriñon arituko delako eta tartean Mecalia Atlético Guardés, Bidebietan.
2017 urte hasiera, mamitsua. Super Amara Bera Bera Rocasa hartuko du urtea irekitzeko urtarrilaren 14ean, gipuzkoarrak Barakaldon arituko dira ondoren Prosetecnisa Zuazorekin eta lehenengo itzulia amaitzeko Esencia 27 ULE Cleba León Donostian izango da urtarrilaren 28an.
Otsailean, bi partida. Valladolidera eta Elche Mustang, Bidebietan. Otsailaren 18an Kopako kanporaketan ez du parte hartuko Super Amara Bera Berak, hurrengo bidaia Valentziara egingo duena. KH7 Granollers Bidebietan eta Malagara martxoaren 11n. Beste etenaldia eta hiru jardunaldi Aste Santu aurretik: Mavi Nuevas Tecnologías Bidebietan, Madridera Base Villaverde bisitatzera eta Helvetia Alcobendas Donostian. Aste Santua behin pasaturik eta Kopa aurretik, A Guardara.
Kopa ostean, maiatzean, Super Amara Bera Berak BM Porriño hartuko du Bidebietan, horren ostean Teldera egingo du bidaia –ia ohikoa bihurtzen ari dena- eta Liga amaituko du Bidebietan Prosetecnisa Zuazo Barakaldorekin eta Leonen, hau ere ia tradizionala.
Ikus Liga Loterías egutegia
Europa
Hori guztia Europako partidak kontatu gabe. Super Amara Bera Berak Txapeldunen ligako multzoe faserako txartela lortuz gero urriaren 12tik azaroaren 19ra arte, astean bi partida jokatuko lituzke: Rincón Fertilidad Bidebieta (U12), Astrakhanochka (U16), Gijón (U19), Vardar Donostian (U22), Base Villaverde Bidebietan (U26), FTC Gascan (U29), Alcobendasen (A2), Budapesten (A5), Guardés Bidebietan (A9), Astrakhanochka Gascan (A12), Porriño (A16) eta amaiera Skopjen Macedonian azaroaren 19an.
Donostiarrek partida bakarra irabaziz gero EHFko hirugarren kanporaketari ekingo diote azaroaren 12 eta 19an, hortaz, galiziarren aurkako partidak aurreratuko lirateko Guardesen aurkakoa - Challengeko norgehiagoka dute ere bai- eta Porriñora bidaia. Atarikoan bi partida galduz gero urrian sartuko litzateke Super Amara Bera Bera EHFn.
2017ari begira, Super Amara Bera Bera Txapeldunen ligan arituz gero, beste sei partida ziurtaturik ditu, Txapeldunen ligan bertan edo EHFko multzoko fasean.