03 Martxoa 2012

Bera Bera Eskubaloiak urrats berri bat eman du sailkapeneko bigarren postuari eutsi aldera, gaur arratsaldean Porriñon (21-32) nagusitu ostean, etxetik kanpo seigarren garaipen jarrian (10-14, atsedenaldian) eta hamaikagarrena azkeneko 12 partidan. Donostiarrak faborito ziren partida atarian gaztea eta igo berri den BM Porriño taldearen aurrean. Galiziarrek norgehiagoka hasieran eutsi dio Bera Berari, lehenengo zati erdialdean tartea zabaldu duena (6-11). Atsedenaldi ostean, Bera Berak defentsa hobetu du, kontraerasoak gauzatzeko aukera izan ditu eta barneraketak bitartez Porriñoren defentsa apurtu. Partziala 1-6 izan da aurreneko hamar minutuetan eta Bera Berak abantaila kudeatzen jakin izan du, hamar goleko tartea partida amaiera arte zainduz, bederatzi kanporaketa jasan arren, Elxen zoritxarreko partidan bezala. Bera Berako entrenatzaile Reyes Carrerek ateko ardura osoa eman dio gaur Yamiley Rodriguezi eta kanariarrak erantzun egin du. Era berean, minutuak banatu ditu eta atsedena eman dio Eider Rubiori. Azpimarratzekoak dira Anna Punkoren lau golak, pozik bukatu du partida errusiarrak; Arizagaren bi golak eta pistan egin dituen minutuak, Libe Altunaren errekuperazioa eta Eli Pinedoren sei golak, taldeko golegile nagusiena izaten jarraitzen duelarik. Garako kazetari Juan Carlos Elorzaren datuen arabera, Reyes Carrerek gaur 300 partida bete du Bera Berako entrenatzile gisa. Reyes Carrere eta taldea denboraldi bikaina betetzen ari dira. Bera Bera Eskubaloiak urtarrilaren erdialdean bigarren postura egin zuen salto eta orduz geroztik ez du arriskuan ikusi, bederatzi jardunaldi jarraian bere eskuetan du datorren denboraldian Europako Kopa jokatzeko aukera emango duen leku hori. Fitxa Porriño 21 (10+11) Makarenko eta Iris, Ana Rodríguez (1), Aloa Martínez (1), Isa Bastero (2), Bibiana (5), Sandra (1), Maialen Mugica, Paula Fernández (5), Estela Doiro (5), Cecilia eta Cadens (1) Bera Bera 32 (14+18) Yamiley, Berta (5), Rubio, Cuña (2), Carvalho (1), Campa (2), Pinedo (6), Ziarsolo (4), Punko (4), Altuna (2), Menéndez (1), Arizaga (2) eta Bea Fernández (3) Epaileak: Gonzalo Miranda eta Fernando San Pedro (Madrid) Kanporaketak: Alo Martínez, Isa Bastero (2) eta Sandra BM Porriñotik eta Rubio, Arizaga (2), Cuña (2), Pinedo (2), Ziarsolo eta Campa Bera Beratik. Partzialak: 3-3,4-5, 5-8,6-9,8-12,10-14–atsedenaldia-11-18, 11-20,13-23,15-26,19-28 eta 21-32.

02 Martxoa 2012

Bera Bera Egia jubenil taldeko kapitaina da. Aurreneko fasean berdikenta bat izan ezik partida guztiak irabazi zituzten orain, aldiz, sufritzen ari dira, izan ere, hiru norgehiagoka galdu dituzte Euskadiko txapelketan. Halere, Uxue Ezkurdia baikor da eta bigarren itzuli honetan egoera aldatuko dela pentsatzen du. “Kalitatea badugu behintzat ibilbidea hobetzeko” ohartarazi du Bera Bera Egia jubenil taldeko jokalaria. Uxue Nora Azurmendi eta Olatz Ramonekin batera, ohorezko mailarekin entrenatzen hasi zen Brasilgo Mundialak eragindako etenaldian. Eta bertan jarraitzen du. Urtarrila bukaeran Reyes Carrerek ezustekoa eman zion. “Etxebarrin Kukullagaren aurka jokatzeko deialdian sartuko ninduela esan zidan”. Anna Punko eta Melinda Berta min hartuta ziren eta Uxue Ezkurdiak autobusean egin zuen bidaia, Olatz Ramon Leonera urrian bezala. Bizkaian izanda, jubenil mailako taldekide batzu gerturatu ziren eta beroketa ere ez zuten galdu. “Bai, hor egon ziren partida ikusten eta animatzen” aipatu du. Debuta Gutxik espero zutena iritsi ziren, hau da, ohorezko mailako taldearekin debuta egin zuen Uxuek. Bigarren zati erdialdean Reyes Carrerek berotzeko esan zien Uxue eta Eider Rubiori eta hamar minutu falta zirela, Kukullagaren pistara sartu zen Uxue 18. zenbakiarekin. “Ezin nuen sinistu, ahal dudanean partidak ikustera nator eta ni barruan negoea ezin nuen sinisten” azaldu du. Izan ere, aurreneko lerroan jokatu zuen Uxuek, ondoan Bea Fernandez -112 aldiz internazionala-, Anita Campa serbiarra edo, besteak beste, Matxalen Ziarsolo zituela. “Hasieran oso urduri nengoen baina gero ondo sentitu nintzen eta Eider Rubiok asko lagundu zidan” dio. Uxue ausarta izan zen, baloia jokatzen saiatu zen eta barruraka egiten. Dara Carvalhori pasea eman zioen eta penalti bat ere egin zioten. “Oso esperientzia polita izan zen” onartu du. Halere, partida baino, erritmoa edo intensitatea baino, Uxuek ohorezko mailako jokalariek egiten duten “lana” txalotzen du.”Asko entrenatzen dute, ariketa ezberdinak egiten dituzte, gustoko dut nola betetzen duten eskatutakoa eta nola bizi duten kirol hau” azpimarratzen du Bera Bera Egia jubenil taldeko kapitainak. Ohorezko mailan dituen ereduaz galdetuta, Uxuek “Eider Rubio eta Eli Pinedo” aipatzen ditu, azken honen “jaurtitzeko era batez ere”.

02 Martxoa 2012

Oso bidai berezia da Bera Bera Eskubaloi taldeko galiziarrarentzat. Verónica Cuñak orduak inbertituko ditu familaren ondoan egoteko, izan ere, laster izeba izango da eta, bestetik, Porriño jaioterrian aurreneko aldiz jokatuko du ohorezko mailan. Berarentzako “han jokatzea berezia izango da bertan eskubaloia bizi nuelako eta jokalari asko ezagutzen ditudalako” aipatu du.. “Berezia izango da partida aurretik eta ostean, partidan ahalik eta ondoen egin behar dugu” ohartarazi du. Bera Berak gaur egin du bidaia autobusez Porriñoraino eta jokalari guztiak prest dira bihar, arratsaldeko 6etan, emakumeen eskubaloiko ligako 19. jardunaldiari ekiteko. Anna Punko minutuak izan zituen Cleba Leonen aurkako partidan eta Libe Altuna sendatu dira. Bihar larunbata, Bera Berak ordu beteko entrenaldi saioa egingo du udal kiroldegian bertan, goizeko 10etatik aurrera. “Porriño ligara egokitu da” Bera Berako zentralak onartu du faborito direla bihar. Izan ere, aurreneko itzulian Porriñok 11 gol baino ez zituen egin Bidebietan. Cuñaren iritziz “Porriño ahulago ikusi nuen orduan, denboraldi ona burutzen ari dira baina, batez ere etxean –Elda Prestigio gainditu zuten- eta orain, dirudienez, ligara egokitzen ari dira talde gaztea izan arren”. Zentzu honetan, Cuña baieztatzen du “hobeak garela”, halere “pistan frogatu behar dugu nagusitasun hori” ohartarazi du. Galiziarra “pozik” dago Donostian eta “aurten gainera EHF Cup jokatzeko aukera izan dut, Ladaran aurkako kanporaketa galdu arren”. “Halere – jarraitzen du galizarrak- partida sutsuak jokatu genituen, Gasca bete genuen eta gauza guzti horiek betetzen gaituzte jokalari gisa haziz”. Anna Punkoren lesioak minutuak eman dizkio Cuñari. “Bai, eskuin hegalean ere jokatu dut baina pistan egotea da garrantzitsuena eta posizio ezberdinetara moldatzen saiatzen gara” azaldu du. Taldearen asmoa da “bigarren gelditzea, merezi dugulako eta lan handia egiten ari garelako” eta bestetik, Kopa ere aipatzen du “gauza positiboak egin nahi dugulako bertan”. Martxoan “nekea” agertu arren, Verónica Cuña “baikor” da egutegiari so eginez gero, batez ere, Elche eta Sagunto hartuko baitu Bera Berak “bigarren lekuari eusteko”.

01 Martxoa 2012

Bera Bera Eskubaloiak erronka nagusia berretsi dezakeen hilabetean sartu gara gaur, bigarren postua konfirmatzeko helburua, alegia. Txapelketa amaitzeko zortzi partida gelditzen dira eta martxoan jokatuko dira horietako lau.

Emakumeen eskubaloi ligako sailkapenari so eginez gero, Bera Berak etxetik kanpo bi partida eroso izango ditu, Porriñon, larunbatean eta Castro Urdialesen, martxoaren 17an. Etxean zailago izango ditu, izan ere, Elche-Mustang eta Mar Sagunto hartuko dituelako.

Martxoaren 10eko Elche-Mustang taldearen aurkako norgehiagoka adi adi jarraituko dute. Alde batetik, Bera Berak gogoan du, oraindik ere, lehenengo itzulian jaso zuen porrota (27-24), aurreneko zati penagarri baten erruz (15-8) eta, jakina, Altean apirilaren 12an, arratsaldeko 6etan, Kopako final-laurdenetako kanporaketa izango delako.

Alacanteko taldeak, egun Bera Bearak baino bost puntu gutxiago duena, partida guztiak irabazi zituen Itxakoren aurka jokatuko du gaur. Ondorioz, donostiarrek Bidebietan irabaziz gero, bigarren postuko lehiatik at bidaliko dute Elche-Mustang taldea.

Martxoaren 17a ere garrantzitsua izango da. Izan ere, Bera Berak Castro Urdiales jokatuko du eta, era berean, sailkapena eragina izan ditzaketeen Mar Sagunto – Itxako eta Elche Mustang-Mar Alicante partidak, batez ere, aurrenekoa. Valentziarrek donostiarrek baino bi puntu gutxiago dituzte orain eta Donostiara etorri aurretik norgehiagokarik zailena izango dute orduan.

Mar Sagunto, martxoaren 31n

Eurokopa jokatzeko sailkapen fasea dela eta –Eli Pinedo eta Bea Fernández deitu ditu Dueñasek- lehiaketak aste beteko atsedena izan ondoren, partidarik erabakigarriena iritsiko da. Martxoaren 31a gorriz dago Bera Beraren egutegian, Mar Sagunto hartuko baitu. Bera Berak urrats handia eman lezake valentziarrak gaindituz gero, hau da bigarren postua berretsi Kopara abiatu aurretik. Lehenengo itzulian Saguntoko garaipenak bide onean kokatu zuen Bera Bera.

Apirilean, Kopa ostean, emozioz beteriko 23. jardunaldia biziko dugu, BM Alcobendas-Bera Bera eta Mar Sagunto-Mar Alicante partidak jokatuko baitira. Donostiarrek Rocasa eta Ucam Murcia etxean hartuko dituzte eta, erdian, Elda Prestigioren aurkako partida Alacanten.