30 Martxoa 2012

Asteburua gaur arratsaldean hasiko da Bera Berako harrobiarentzat. Izan ere, udazkeneko kopa prestatzeko lehiaketan Egia Bera Berak azken jardunaldiari ekingo dio gaur 19,45etan, Oñatiko Zubikoa kiroldegian, Aloña Mendiren aurka. Donostiarrek lehiaketa irabazita izan arren gustuko dituzte Debagoienan ematen diren norgehiagokak.

Bestetik, Bera Bera Egia Infantil A taldea bihar Elgoibarren arituko da goizeko 11,15etan Federópticos Ikus Elgoibar liderraren aurrean. Bera Bera Egia Infantil B taldeak, aldiz, Eibar Eskubaloia hartuko du igandean Bidebietan, goizeko 10etan.

Azkenik, Egia Bera Bera eta Bera Bera Egia kadete 1 taldeen arteko derbia bertan behera gelditu da.

30 Martxoa 2012

Bihar betiko orduan eta lekuan, arratsaldeko 7etan, etxean, Bidebietan, alegia. Historikoa izan daiteke partidan Bera Berak Mar Sagunto hartuko du, hirugarren sailkatua eta Donostian donostiarrek birritan baino ez dute gainditu. Garaipenak Championseko ate ondoan kokatuko luke Bera Bera, donostiarrentzat balentria izugarria azpitxapeldunak ez baitira sekula izan. Donostiarrek irabaziz gero zortzi puntura utziko dituzte valentziarrak, hau da, gaindiezinak izango lirateke emakumezkoen eskubaloi liga amaitzeko lau jardunaldi falta direnean. Gaur arratsaldean Bera Berak Lizarrerian izango ditu belarriak jarrita, izan ere, Itxakok BM Alcobendas mendean hartuz gero donostiarren helburua gertuago legoke. “Hitzordu historikoa da 20 urte kosta zaigulako hona iristea eta garaipenak kluba beste maila batean kokatzen du” adierazi zuen asteartean prentsaurrekoan Reyes Carrerek. Partidaren inguruko guztia prest dago. Matxalen Ziarsolo kapitainaren hitzetan “ilusio handiz gaude, bigarren izateko gogokin eta, egia esan da, uste dugu bai taldeak bai klubak merezi dugula”. Bidebietan sinistu Bera Bera Eskubaloiak dei berezia egin nahi dio zaletuari Bidebietara hurbiltzeko taldea animatzera, Lada Togliattiren aurkako kanporaketan Gascan bezala ikuskizunaz gozatzeko eta proiektuaren partaide izateko. Datorren urtean Championseko ateak jokatzera daramatza garaipenak. Matxalen Ziarsolok adierazi zuen bezala “eskubaloi zaleari eta gure ondoan egon direnei dei egiten diegu Bidebietara etortzera gu animatzera eta historikoa izan daitekeen partida disfrutatzera”. Bidebietan asko sinesten du talde honek, porrota bakarra jaso du Itxakoren aurka. Eta taldeak konfidantza osoa du bere jokuan, izan ere, azkeneko 14 partidatatik 13 irabazi dituzte. Eider Rubiok minekin jarraitu arren, taldeak Mar Sagunto gainditzea espero du eta martxoan Champions postua berretsi. Nork esango zuen!

29 Martxoa 2012

Bera Bera Eskubaloia ahalik eta ondoen prestatzen ari da Mar Saguntoren aurkako partida, larunbatean Bidebietan arratsaldeko 7etan, lau jardunaldi falta direla bigarren postua berretsi dezakeen norgehiagoka, hain zuzen. Atzo entrenaldi fisikoa burutu zuten goizean, arratsaldean Donibaneko mutilen aurka lagunartekoa jokatu zuten. Gaur internazionalak bueltatu dira taldera, arerioaren bideoak ikusi dituzte eta entrenaldi saioa burutu. Bihar Bidebieta kiroldegia itxita egongo da greba orokorra dela kausa eta, ostiralean, azken saioa Mar Sagunto hartu aurretik, hirugarren sailkatua donostiarrek baino sei puntu gutxiago dituelarik. Reyes Carrerek aipatutako “hitzordu historiko” honen aurrean, Eider Rubio zentrala duda da. Donostiarrak etxean gelditu behar izan zuen Castro Urdialesen aurkako partida gerrialdeko mina zuela eta egun ez da guztiz osatu. Atzoko prentsaurrekoan Reyesek berak onartzen zuen Eider Rubioren partaidetza kokolan zegoela. Saguntoren aurrean, bi garaipen baino ez Valentziarrak oso arerio gogorra izan ohi da Bidebietan. Izan ere, Bera Berak bost aldiz baino ez dio irabazi, birritan Donostian eta hirutan Sagunton. Hori bai, garaipen gehienak azkeneko urtetan eman dira, besteak beste, iaz Bera Bera 29-26 nagusitu zen, 08-09 denboraldian Bidebietan 40-34 eta 28-30 Sagunton eta oraindik taldeak gogoan du aurtengo denboraldian lehenengo itzulian eman zen garaipena (21-25).

27 Martxoa 2012

“Klub honekin bat dator partida, pixkanaka hazten joan den kluba, urtero gauzak hobetzen saiatu dena eta lortzekotan garaipenak beste maila batean kokatuko gaitu, inoiz lorturiko sailkapenarekin eta ondorio garrantzitsuekin” horrela azaldu du Reyes Carrerek Bera Berak eta Mar Saguntok larunbatean Bidebietan (19tan) jokatuko duten norgehiagoka. Ikus Reyes Carrere bideoa

Donostiarrek valentziarrak gaindituz gero eta Itxakok gauza bera egiten badu BM Alcobendasekin (Lizarreria, larunbata 18tan), Bera Berak birtualki bigarren postuaren jabe egingo litzateke Champions jokatzeko aukerarekin liga amaiatzeko lau partida falta direla.

Horregatik, Reyes Carrere entrenatzaileak “hitzordu historikoaz” mintzo da. “Gipuzkoako kirolak jakin beza talde bat Champions postuak eskuratzeko zorian dagoela” oihukatu du. Bera Berako prestatzaileak ohartarazi du erronka “garrantzisua bezaian zaila da, hain konplikatua da ezen 20 urte kosta zaigu hona iristea eta klub honek horrelakorik merezi du”.

Bidebietan larunbatean biziko den giroaz galdetuta, Reyes Carrerek adierazi du “gure zaletua leiala da, eskubaloiaz ulertzen duena eta garbi du ze Bera Bera ikusi nahi duen , hau da, Bera Bera alaia, borroka egingo duena, elkartasuna eta kemena bezalako baloreak zabaltzen dituena”. “Bidebietak beti eskatu izan digu anbizioaz aritzea eta borrokatuz gero porrotak barkatu dizkigu” aipatu du.

Erregulartasuna

Azkeneko 15 partidatatik, Bera Berak 14 irabazi ditu; liga osoan gol batez Itxakoren aurkako norgehiagokak galdu ditu, Elxen eta Leonen, berdindu. Hori dela eta, hirugarren postuan diren Mar Sagunto eta BM Alcobendas sei puntura daude egun. Honetaz “aurtengo meriturik handieta erregulartasuna da” dio Reyes Carrerek.

Lehenengo itzulian Mar Sagunto hiru puntura eta Dara Carvalho pibotearen baja zituela egin zion bisita Bera Berak. Donostiarrek sekulako partida egin zuten eta 21-25 emaitzak bigarren postuari begira kokatu zituen. Bera Berako entrenatzailearentzat egoera ezberdinak dira azarokoa eta oraingoa. “Martxoan gaude, denboraldia aurrera doa eta nabaritzen dira partidak, Saguntok jokalari garrantzitsuak galdu arren adi egon behar dugu edozein momentutan galdu dezakegulako” ohartarazi du.

Horregatik, “aurrera begiratu behar dugu eta abiaduraz gozatu”. Era berean “sutsu defendatu behar dugu arazoak uxatzeko” eskatu du eta, bere ustez, “eserleku luzea izateak desorekatu dezake partida”.

Zentzu honetan, partidaren garrantziaz jabetuta, Reyes Carrerek ez du “taldea estututa ikusten, izan ere, eskarmentu handiko jokalariak ditugu eta taldeari lasaitasuna eman diotenak”.