Bera Bera - Berriak

07 Iraila 2015

Bera Bera Eskubaloiak garaipenarekin debuta egin du ohorezko ligako aurreneko partida Aiala Zarautz 36-13 gaindituz, gipuzkoarren arteko derbian non donostiarren defentsak zarauztarren eraso jokoa ito duen. Halere, Aiala Zarautz sutsu irten da donostiarren erasoa oztopatu nahian eta ezker hegalakoari, kasu honetan Matxalen Ziarsolori asko presionatuz, albokoen barneraketak baliatuz, Arrojeria, Fernández eta Martínez, alegia. Bera Bera aurretik jarri da 4-2 baina Andrea Zalduak hutsuneak aurkitu ditu defentsan, Martínezi adierazitko zigorrari esker Aiala Zarautz gerturatu da eta baloia izan du norgehiagoka berdintzeko baina Zugarrondorekin topatu da, gaur titular. Bidebietako giro apartan Puchek ez zion erlajaziori betarik eman nahi eta berriro ere Sans-Martínez bikoteari eman dio ardura defentsa erdian, Etxeberria eta Arrojeria lagun eta Fernández eta Ziarsolo albokoetan. Ederrak Sans ordezkatu du erasoan. Zazpiak pistan, Bera Berak 6-1 partziala bereganatu du Pinedo eta Yáñez sartuta, azken hau oso eraginkor jaurtiketetan, atsedenaldira lau golekin joan baita, hortaz Bera Bera jaun eta jabe (14-6). Lehenengo zatian bezala, Aiala Zarautz ondo heldu dio bigarren zatiari. Zaldua eta Granadok asmatu dute Temprano atezainaren aurrera eta bestetik donostiarren aldetik Menéndez eta Arrojeriak erantzun ona eman diote. Bera Beraren defentsa gaindiezina bihurtu da Aialarentzat eta Ane del Hoyok (17-10) jarri arren etxekoak Ziarsoloren bidez kontraerasoak gauzatu dituzte. Azken ordu laurdena Bera Bera baino ez da pistan gelditu, azkeneko 17 minutuetan golik jaso ez duena eta, aitzitik, ate aurrean asmatu duena. Fitxa: Bera Bera 36, Aiala Zarautz 13 Bera Bera 36 (14+22): Zugarrondo, Etxeberria (1), Fernández (7), Arrojeria (3), Ederra (4), Martínez (3) eta Ziarsolo (3) –hasierako zazpikoa- Sans, Ezkurdia (2), Yáñez (6), Menéndez (4), Pinedo (3) y Temprano (o.a.). Deialdian: Eider Lizarbe eta Maialen Husillos. Aiala Zarautz 13 (6+7): Collantes, Badiola (2), Zaldua (5, 2p), Artola, Urtiaga, Arregi (1) eta del Hoyo (1) –hasierako zazpikoa- Granado (2), Fernández, Kortaberria, Goikoetxea (1), Arruti, Alcoba (1), Balenciaga eta Odriozola (o.a.). Epaileak: Colmenero eta Rollán (Gaztela eta Leon) Kanporatuak: Martínez, Arrojeria (2), Sans eta Menéndez Bera Beratik eta Fernández, Badiola eta Kortaberria Aiala Zarautzetik. Partzialak: 4-2, 5-4, 7-4, 10-5, 13-6, 14-6 –atsedenaldian- 16-9, 19-12, 23-13, 26-13, 31-13 eta 36-13 Gertaerak: Foru diputatu Denis Itxasok Matxalen Ziarsolo eta Araitz Urtiaga kapitanei Iñaki Gracenearen serigrafi bana banatu die partida atarian.

07 Iraila 2015

Loterias izeneko emakumeen eskubaloiko Ligako lehenengo jardunaldi amaieran Bera Bera Eskubaloia da aurreneko líder Aiala Zarautzen aurkako partidan lortutako golen aldeari esker (36-13). Jardunaldian ez zen aparteko sorpresarik eman, etxeko taldeak nagusitu ziren eta emaitza airean zegoen Rocasa Ace Gran Canaria eta Mecalia Atlético Gaurdés partidan, Teldeko jokalariak nagusitu ziren bigarren zatian (18-16), atsedenaldiko markagailua irauliz (5-8). Golen alde gehien eman zen bigarren partidan beste derbi batean izan zen Valladolideko Aula Cultural Valladolid eta Leongo Carobles Ule Cleba taldeen artekoan (44-31). Gainontzekoetan etxeko taldeak ondo baino hobeto kudeatzen jakin izan zuten lortutako tarteak: Prosetecnisa Zuazo Barakaldok KH7 Granollers (31-25) gainditu zuen, Elche Mustang taldeak Jofemesa Oviedo (24-20), Helvetia Alcobendasek Canyamelar Valencia (25-22) eta BM Porriñok Clínicas Ríncón (35-31). Bera Berak azkeneko lau denboraldietako tarterik zabalena lortu zuen larunbatean. 2013ko denboraldian donostiarrak Cleba León (46-20) gainditu zuten eta hurrengo denboraldian, urte bereko azaroan, Kukullaga Etxebarri (15-40). 13 gol jasota Denboraldiak pasa ahala, geroz eta gol gutxiago jasotzen du Bera Berak. Halere, taldean eman diren aldaketak kontutan harturik oraindik garaiz da etorkizunean gertatuko dena aurreratzeko baina jokatu diren bi partida ofizialean, Rocasak 17 gol egin zizkion eta Aiala Zarautzek, 13. 2011ko urrian Porriñon hamaika gol baino ez zituen sartu eta 2012ko urtarrilean, Ucam Murciak 13. Azkeneko bi urteetako liga hasierak ere urriak izan ziren golak jasotzeko garaian. Imanol Álvarez eta Martin Larrañagaren taldeari 16 gol sartu zizkion Mecaliak A Guardan (Bera Berak, 23) eta iaz KH7 Granollersek, ohorezko mailan egindako debutean, 15 Bidebietan. Alicia Fernández eta Tania Yáñez Gola egiteko garaian oso banatuta zegoen baina batez ere albokoen lana azpimarragarriena izan zen, etorri berri diren Alicia Fernández eta Tania Yáñez, Bidebietan jokaturiko aurreneko partidan. Galizarrak hutsuneak aurkitu zituen zarauztarren defentsan zazpi gol sartuta eta bizkaitarra aurreneko zatian eraginkorra izan zen lau golekin (guztira, sei) Bigarren jardunaldian, Valentziako El Cabañal pista zailari egingo dio aurre Canyamelarri Bera Berak, iaz garaipena azken baloian lortu zuelarik. Bestetik, azpimarratzekoak dira galiziarren arteko derbia A Guardan eta Rocasaren bisita Oviedori, Zuazorena Malagari eta Aula Culturalena Zarautzen.

04 Iraila 2015

Bera Bera Eskubaloia eta Aiala Zarautz taldeak ohorezko mailan arituko dira aurtengo denboraldian eta gipuzkoarren arteko aspaldiko derbiak elite mailan gogora ekarriko dituzte. Donostiarrak eta zarauztarrak Bidebietan irekiko dute larunbatean (18etan) 2015-16 denboraldian ligan (Luis Ignacio Colmenero eta Víctor Rollán, Gaztela eta Leon).
Gipuzkoarren arteko azken derbia ohorezko mailan 1997ko urtarrilaren 19an eman zen. Orduan Corteblanco Bidebieta eta Hernani elkarren aurka aritu ziren igande eguardi batean Bidebietan, donostiarrak nagusi zirela (19-13) besteak beste, Tati Garmendia eta Reyes Carrerek launa gol sartu zituzten eta Hernanitik etorritako Eider Rubio donostiarrak bi golekin, Juan Carlos Elorza kazetariaren datuen arabera.
1996-97 denboraldian ohorezko mailan bat egin zuten Bera Berak, Hernanik eta Arrate Amañak. Bi multzoetan zati zuten Liga eta donostiarrak zein eibartarrak titulua jokoan zuten taldeen artean sartu ziren. Azkenean Bera Bera laugarren eta Arrate Amaña bosgarren gelditu ziren; Hernanik, aldiz, maila galdu zuen.
Gipuzkoarrak elitean
Gipuzkoarren presentzia emakumeezkoen eskubaloiko elitean 70 hamarkadatik bermaturik dago. Orduan Medina Guipúzcoa eta Pasajes ziren, donostiarrek 1973 eta 75an Espainiako txapelketa eskuratuz.
Ohorezko maila sortu zenean 1982an, Ayete zen gipuzkoar ordezkaria. Hurrengo urtean Zarautz eta Hernani igo ziren, azken hauek erreferentzia bihurtuz.
1990-91ean egin zuen debuta Corteblanco Bidebietak. Donostiarrak eta hernaniarrak zazpi urtez izan ziren elitean eta Arrate Amañarekin (Pinedo ahizpak handik etorri ziren) hiru talde elkartu ziren hiru urtetan. 1996-97 denboraldia amaituta, Hernanik maila galdu zuen eta Arrate Amañak arazo ekonomikoak medio uko egin zion eliteari. 97-98 denboraldi amaieran Bera Berak beregain hartu zuen Donostiako eskubaloi taldea, aurten ohorezko mailan 26. denboraldia beteko duena.

04 Iraila 2015

Arratsaldeko entrenaldi ostean eman du deialdia Montse Puche eta 2015-16 denboraldiko ligan debuta egiteko ohizkoak eta Eider Lizarbe eta Maialen Husillos. Bera Berak bihar larunbata Bidebietan (18etan) goi mailara igo berri den Aiala Zarautz hartuko du, ohorezko mailan aurreneko aldiz elkar ikusiko dute bi taldeek, Gaztela eta Leongo Luis Ignacio Colmenero eta Víctor Rollán zuzenduko duten partidan. Maialen Múgica ezik Puchek plantilla osoa du prest, Superkopan bezala Eider Lizarberekin osatuko du deialdia eta Maialen Husillos deitu du, Zarautzen Canyamelar Valentzia taldearen aurka ohorezko mailan debuta egin zuena. Laugarren Superkopa jarraian eskuratu eta gero –orokorrean, bosgarrena- Aiala Zarautzen aurka asteartetik aurrera prestatzen ari da Bera Bera. Bi taldeek Egiako txapelketan elkarren aurka jokatu zuten abuztuaren 26an donostiarrek garaipen erraza lortuz (38-17). Montse Puche eta Tati Garmendiak ohartarazi dute astean zehar “Ligako partida ez du zer ikusirik izango Egiarekin”. Bera Berarentzat bultzada bat suposatu du Superkopak, batez ere defentsan oso sentsazio onak utzi zituen partidak, erasoan zer hobetzeko egon arren, aste honetan Montse Puchek eta Eider Rubiok landu dutena. Bera Bera eta Aiala Zarautz partida aurreneko aldiz biziko da ohorezko mailan, gipuzkoarren arteko derbia duela 18 urte izan baitzen, 1997ko urtarrilaren 19an Bidebietan jokatu baitzuten Corteblanco eta Hernani (19-13). Biharko, Bidebietak bost partida hartuko ditu: harrobiko taldeak 11,30etan hasiko direlarik: kadete mutilak, kadete eta jubenil neskak Bera Bera eta Elgoibarren artean; eta nesken seniorretan Bera Bera eta Zarautz B, eta amaitzeko ohorezko mailakoa, 18etan. Argazkian (Juan A. Garaikoetxea): Maialen Husillos Nantesen aurkako lagunartekoan

03 Iraila 2015

Taldeko bigarren kapitaina Eli Pinedo komunikabideen aurrean agertu zen bosgarren Superkoparen eta larunbatean Aiala Zarautz taldearen aurkako liga hasiera (Bidebietan 18etan) komentatzeko.
Hegaleko jokalari internazionalak onartu du Bera Bera faboritoen multzoan egotean, nahiz eta “denboraldiak pasatu ahala geroz eta zailagoa izan” baina, era berean, dio “guretzako ez da presiorik, guztia 60 minutuetan frogatu behar delako”.
Superkoparen inguruan aipatu du “zalantzak genituen baina defentsan oso ondo ibili ginen, gauza asko hobetzeko egon arren”. Asko indartu diren taldeak egon arren, bere ustez “gu geu gara aurkaririk okerrena eta hori da gure ardura, zer garen eta nora goaz”.
Aiala Zarautz taldearen aurkako larunbateko derbiaz, Pinedorentzat “oso partida polita izango da bi zaleentzat” eta onartu du zarauztarrek “ezer galtzeko ez dutela eta guztia emango dute mailari eusteko”. Horregatik dio “Superkopa ostean, intentsitate handiko partida eta gero arriskutsua litzateke gogo horiekin ez irtetea”.