13 Ekaina 2013

Bera Berako presidente Fernando Diez Mintegi eta eskubaloi arloko ardurandun Tati Garmendia komunikabideen aurrean agertu dira gaur Kirol Etxean datorren denboraldian Champions League jokatzeko erabakia azaltzeko. Bera Beraren arduradunen ustez “Champions League jokatzea arriskua baino, aukera bat da”. “Azkeneko 23 urte hauetan aurreneko aldiz Liga irabazi dugu eta Championsa jokatzeko hautua egin dugu aukera bat delako, bai baliabideak lortze aldera bai hiriari kirol ikuskizun aparta eskaintzeko” azaldu du Fernando Diez Mintegik. “Champions jokatu ahal izateko babesle baten beharra aipatu genuen, halere, askoren ekarpenekin aurrekontua osatzeko helburua lortuko dugula uste dugu” adierazi du presidenteak. Azalpenean, Diez Mintegik argitu du “funtsean, Europa jokatzea ala ez jokatzea zen erabakia, EHF edo Errekopan aritzea antzekoak dira, kanporaketa berdinak jokatuko ditugulakoan”. Egindako gestioak lagun, “pista egokitzeko kostuak Eusko Jaurlaritzako kiroletako zuzendari Jon Redondok beregain hartu zituen eta ETBk zuzenean eskainiko lituzke lehenengo faseko hiru partidak”. Halere, Fernando Diez Mintegik onartu du “aurrekontuaren %15a osatzea falta zaigu, hau da, 100.000 euro gutxi gorabehera, eta aukera guztiak zabalik ditugu –jarraitzen du presidenteak- babesle nagusia bat, inbertsioaren itzulera taldeak emango lioken oihartzuna bermatzen delarik, edo ekarpen urriagoak, guztiak desgrabazio fiskalak dituztelarik”. Horregatik ‘Erronka honekin bat egin’ leloa aldarrikatu du, “ehun enpresek mila euroko ekarpena egitea da helburua denboraldiari zuzen ekiteko”. Horregatik, “lanean jarraituko dugu aurrekontua osatzeko eta emakumeen eskubaloiko Champions League bezalako kirol ikuskizun aparta Gipuzkoako gizartearekin gozatzeko”. Arlo instituzioetan izandako murrizketak direla eta, klubak ere gerria estutu du. Tati Garmendiaren esanetan “jokalariek esfortzua egin dute eta plantilla indartuko da baliabideen arabera”. Bere ustez, “aukera bat da, jokalari bezala Europako talde indartsuenen aurka jokatu nahi dugulako eta kusle bezala Europako txapeldunak Donostian ikusteko aukera liluragarria izanik da eta ezin diogu ukorik egin, nahiz eta guztiok gehiago jarri behar dugun”. Gipuzkoako Foru Aldundiak emango duen subentzioaz galdetuta, Fernando Diez Mintegik berretsi du “eskerrak eman behar diegu instituziei gu orain hemen gaudelako”, horrez gain, ziur dago “gure aurrekontuan jarrita dagoen kopurua baino gehiago izango da ekarpena” halere, “Gipuzkoako gizarteak gure erronkarekin bat egiteko deia” luzatu du deia.

11 Ekaina 2013

Bera Bera Eskubaloiak datorren denboraldiko Champions League lehiaketan inskripzioa egin du, ondorioz, gutxienez datorren urriaren 5etik azaroaren 17ra arte Europako talderik onenen ondoan multzon fasean arituko da. Ohorezko mailan jarraian 23 urte eman ondoren eta aurtengo denboraldian Liga eskuratu ostean, Bera Bera Eskubaloiak Europako goreneko txapelketa jokatzeko eskubidea du, kirol arloan nahiz ekonomikoan erronka nagusitzat jo du klubak, ondorio guztiak ondo aztertu dituelarik. Azken egunetan egindako gestioei esker Champions Leaguek eskatzen dituen baldintza zorrotzenak beteko ditu Bera Berak. Ondorioz, klubaren ustez Champions League jokatzeak ez dakar azken urtetan Europako kanporaketak baino gastu gehiago. Datorren ostegunean, prentsaurrekoan, klubeko presidente Fernando Diez Mintegi eta Bera Bera Eskubaloiko ardurandun Tati Garmendiak erabakien zehetasunak emango dituzte.

10 Ekaina 2013

Bera Bera Eskubaloiak bihar asteartean, ekainak 11, erabakiko du 2013-14 denboraldian Champions League jokatuko duen, Europako maila goreneko txapelketan aritzeko, alegia.
Horregatik, azken egun hauetan bilerak eta deiak izan dira instituzioekin nahiz enpresa pribatuekin. Klubeko presidente Fernando Diez Mintegik hiru instituzioetako kirol arduradunekin bildu da, azkena gaur goizean Eusko Jaurlaritzako Kiroletako zuzendari Jon Redondorekin. Topaketa guztiak oso ondo baloratu ditu kluban baikortasuna handituz.
Bestetik, Bera Bera Eskubaloiko arduradun Tati Garmendiak hainbat arlo jorratu ditu Espainiako Federazioko presidente Paco Blazquezekin eta inguruko enpresekin babeslegoa lortze aldera.
Champions Leagueko multzoen fasean aritzeko eskubidea pistan lortu du Bera Berak, erronka ekonomikoa nahiz kirol ikuspegian. Horregatik erabakiak eragiten duten ondorioak ondo aztertzean ari da kluba. Gaur arratsaldean Zuzendaritza Batzordeak egoera aztertu du eta azken gestioen faltan, bihar goizean erabaki definitiboa hartuko du.

07 Ekaina 2013

Lehengo larunbatean Mazedonian lorturiko sei goleko abantailari eutsi nahi dio gaur Espainiako selekzioak Sorian burutuko den itzulerako partidan, abenduan Serbiako Mundiala jokatze aldera.
Jorge Dueñasen taldean dira Eli Pinedo eta Patricia Elorza. Aurrenekoak lau gol sartu zituen joaneako norgehiagokan eta hegalekoa Mediterraneoko Jokuetako deialdian dago, ekainaren 20tik 30era bitartean Turkiako Mersin hirian burutuko direnak.
Mazedoniako partida Soriako Los Pajaritos kiroldegian ospatuko da gaur 19etan, Teledeportek zuzenean eskainiko duelarik. Eta bihar San Sebastian de los Reyeseko Dehesa Boyal kiroldegian, 19etan, Espainiako selekzioak ligako izarrez osaturiko talde baten aurka jokatuko du, egia esanda, A eta B selekzioen arteko partida. Pinedo eta Elorzaz gain, Ana Temprano, Bera Berak fitxatu berri duen atezaina bertan izango da.