21 Urtarrila 2014

Larunbateko partida bukatu ahala, Matxalen Ziarsolok www.deportecienporcien web orrialdeari eskainitako elkarrizketan adierazi zuen “etxetik kanpo 19 gol sartzen baditugu partida gutxi irabaziko ditugu” onartuz.
Eta horrela da. Izan ere ohorezko mailan 24. denboraldia betetzen ari den taldea, hasieran Corteblando Bidebieta eta 98-99tik geroztik Bera Bera bezala, 20 gol baino gutxiago sartuta bederatzi partida bestetik ez ditu irabazi eta hiru berdinketa Donostiatik at. Kapitaina lehen taldean dagoenetik (2001-02) hiru garaipen besterik ez.
Garako kazetariak bildu dituen datuen arabera, gol kopuru horrekin edo antzekoekin lorturiko azken garaipena Mar Alicanteren aurka izan zen 2007-08 denboraldian (18-19). Bitxikeri gisa Matxalen Ziarsolok eta Tati Garmendiak bostna gol sartu zituzten orduan.
1992-93. denboraldian Bera Berari asko kostatu zitzaion gola sartze. Vifirehati taldeari (Arrecife etsa Lanzarote) 17-18 irabazi zien (etxean 18-14) eta 15-17 Leganesen. Horrez gain, Valladolideko Unibertsitateko taldearekin hemezortzina berdindu zuen.
Hernaniren aurkako partidetan gola lorpen preziatua zen. Bera Berak 16-18 irabazi zion 91-92 denboraldian eta 14-18, 93-94ean. Gipuzkoako beste talde baten aurrean, Arrate alegia, 16-19 gainditu zuen 95-96an (hamaseina berdindu zuen handik hilabeteetara).
1997-98 denboraldian Oberenari 17-19 mendean hartu zioten donostiarrek eta 2002-03 denboraldian birritan irabazi zuen (16-18) Granadoko talde bati eta (17-18) Sabadellgo beste bati.
Halere, garrantzitsuena da ez zela denbora asko pasatu “autokritika” onartzeko. Deportecienporcien orrialdeari Imanol Álvarez entrenatzaileak onartu zion “gogoeta egin behar dugu” Mar Alicanteren aurkako partidan gertatutakoaz hausnarketa egiteko, hamabi jardunaldi ostean Ligan taldeak jaso duen lehenengo porrota.

21 Urtarrila 2014

Adriana Cardoso de Castro brasildarra Bera Berako plantillako partaide da berriro ere eta dagoeneko Bidebietan saio fisikoa burutu du gaur goizean. Jokalariak Bera Berarekin kontratua desegitea erabaki zuen familia arazoak argudiaturik, egoeraren larritasuna ulerturik klubak onartu zituenak. Zoritxarrez Adrianaren anaia zendu egin zen eta egun batzuk igarota, klubarekin harremanetan jarri zen bueltatze aldera. Bera Berak interesgarria ikusten du Adrianaren ekarpena, gainera, Helvetia Alcobendas eta Mar Alicante taldeen aurkako partidak galdu ditu bakarrik. Orain eskuin hegalekoak lan fisikoan sakondu beharko du baina Imanol Álvarezek ongietorria emango dio aukera zabaltzen dizkiolako.

20 Urtarrila 2014

Bera Bera Eskubaloiko harrobiko taldeen artean garaipen bakarra lortu zen larunbatean, lurralde mailako kadeteak Urnieta Bosteko Jatetxea taldearen aurka etxetik kanpo (17-18) irabazi ostean. Usurbilen hiru norgehiagoka bizi izan ziren Euskal Ligari dagokionak. Bera Bera kadete taldeak puntu bat urratu zuen (25-25) baina jubenilek (22-14) nahiz senior taldeak (28-25) galdu zituzten eta azken hauek ere lidergotza, orain usurbiltarren eskuetan.

18 Urtarrila 2014

Bera Bera Eskubaloiak Ligan denboraldiko aurreneko porrota jasan du gaur Mar Alicanteren aurka 23-19 galdu baitu, batez ere ate aurrean Susi Sanchez atezainarekin topo egin duelako.
Gipuzkoarrek partida txarra jokatu dute, iaz bezala, Bidebieta partida garrantzitsua eta erabakiorra irabazi ostean hurrengo norgehiagoka aurkari zuzen baten aurren kale egin zuten. Iaz Elche Mustang gainditu ostean Valentzian galdu zuen eta aurten Alcobendas aise mendean hartu eta gero Mediterraneoan berriro galdu ditu bi puntuak.
Gipuzkoarrek 5-0 atzetik jarri dira hasi eta berehala Anabel Mateo eta Marizza Faria jokalarien golen medio. Pixkanaka pixkanaka piztu dira eta aldea murrizten Maitane Etxeberriaren bitartez (8 min., 6-3)
Pinedok berdinketa ezarri du (9-9) baina bi penalti huts egin ditu Bera Berak markagailuan aurretik jartzeko. Mar Alicantek ordea lidergoaren aurrean gai zela frogatu du eta Marizza Faria zuzentzen asmatu du. Jaitsiera postuetan egon arren Mar Alicantek azkeneko lau partidetatik hiru irabazi ditu eta gainera gaur Susi Sánchez atezainak asmatu egin du.
Patri Elorzak berdindu du partida atsedenaldian (12-12) erlojua gelditurik baina bigarren zatia Bera Bera oso gaizki ibili da erasoan, penaltiz ere huts egin du –partida osoan, lau-. Zati honetan gol bat sartu du hamabost minutuetan eta hiru, 20 minutuetan. Ondorioz, partida amaierara hiru goleko aldea zeraman Alicantek (53 min, 19-16) donostiarrek irauli ezin izan dutena.
Partida honekin, Bera Berak hamaika partida jarraian ezarri du liga hasierako markarik onena eta azken porrota 2013ko martxoan izan zenez Valentzian, segidan 17 egin ditu.
Alcobendas, Mecalia Guardés eta Rocasak etxean irabazita gipuzkoarrekiko aldea murriztu dute eta Liga honetan pista guztietan adi egon behar dela agerian gelditu da.
Fitxa: Mar Alicante 23, Bera Bera 19
Mar Alicante 23 (12+11): Susi Sánchez, Andreu (2), Anton (3), Faria (6), Galindo, Mateo (6), Tobiansen (1), Vicente (5), Ivorra, Marti, Estevez, Moreno, Zhukova.
Bera Bera 19 (12+7): Temprano, Etxeberria (4), Elorza (2), Núñez, Menéndez, Pinedo (4), Ziarsolo (2), Arizaga (3), Ederra (2), Ezkurdia eta Arrojeria (2).
Epaileak: Gonzalo Miranda eta Fernando San Pedro (Madrid)
Kanporatuak: Andreu eta Mateo Mar Alicantetik eta Elorza, Núñez eta Ederra Bera Beratik.
Partzialak: 5-0, 7-4, 9-6, 10-9, 11-10, 12-12 –atsedenaldia- 14-13, 15-13, 16-13, 18-15, 19-16 eta 23-19.