20 Abuztua 2015

Frantziako bigarren mailako La Rochelleko Aunis HB taldeari irabazi dio (29-34, atsedenaldian 14-20) Bera Berak Perigny herrian ospaturiko lagunartekoan, Poitou-Charentes eskualdean daraman egonaldian bigarrenean. Donostiarrek ondo heldu diote lehiari (0-3). Bajak kontutan izanik, gaur Ziarsolok ez du jokatu, Puchek aukera gutxi izan ditu baina gauza berriak ere frogatu ditu. Defentsan, 6-0, Sans eta Menéndez erdian kokatu dira, alboan Arrojeria eta Etxeberria, Fernández eta Pinedo hegaletan eta Temprano atepean. Bera Berak oso ondo mugitu du baloia erasoan aurkarien defentsan zuloak aurkituz, Alicia Fernández eta Menénez alboko jokalariek ondo aprobetxatu dituztenak. Horrez gain, transizioan ere azkar eta eraginkor ibili dira bai Pinedo, Etxeberria eta Sans bera ere. Lehenengo zatiko 15. minuturako jokalari guztiek zeramaten gola eta ondoren Ezkurdiak eta Ederrak ere gai izan dira gola egiteko. Puchek ez zuen aldaketarik lehenengo lerroan, hortaz Pinedo minutu batzu bertan egon da eta Ezkurdiak bi gol bikainak sartu ditu esker hegaletik. Aitzitik, defentsak jaurtiketak egiten utzi die frantziarrei, jokuari abiadura jarri nahi ziotelarik. 10-13 jarri dira 20 minutuan baina atsedenaldira iritsi aurretik Alicia Fernándezen bidez eta kontraerasoak medio, Bera Berak tartea aise ireki du (14-20) Bigarrenean, taldea bera Zugarrondok Temprano ordezkatuz. Hasiera ona izan da eta 20-26 jarri da aurretik Bera Bera. Nagusitasuna, nekea eta Arrojeria bi minutu kanpo egoteak Aunis gehiegi gerturatu dute eta Puchek partida gelditu du. Hutsartean taldea berpiztu eta gero, Bera Berak berriro ere hutsuneak aurkitu ditu La Rochelleko taldeko defentsan eta ez du partida arriskuan jarri. Bihar ostegunean ez da partidarik. Ostiralean (18etan) Celles sur Belle herriko txapelketari ekingo dio, Chambray taldearen aurrean. Bigarren mailakoa izan arren, Tours hiriko taldeak lehenengo mailan egotea du helburu. Fitxa: Bera Bera 34 (20-14): Temprano, Pinedo (8), Arrojeria (2), Sans (4), Menéndez (4), Fernández (7) eta Etxeberria (2) –hasierako zazpikoa- Ezkurdia (2), Ederra (4) y Zugarrondo (o.a.). Ez zuten jokatu ez Martínez ez Ziarsolo. Kanporaketak: Arrojeria, Menéndez eta Sans. Partzialak: 2-4, 5-9, 8-11, 10-13, 12-17, 14-20 –atsedenaldia- 17-22, 19-24, 20-26, 26-27, 28-30 eta 29-34

17 Abuztua 2015

Bera Bera Eskubaloia Autocares Davideko autobusera igo da gaur goizean Frantziara bidean, non lau partida jokatuko dituen, horien artean, abuztuaren 21 eta 22an Poitou-Charentes eskualdean dagoen Celles sur Belle herriko txapelketa.
Baina aurretik, bi lagunarteko izango ditu. Bihar Nantesen 18etan bertako taldeari bisitaldia itzuliko dio. Frantziako liga erregularrean bosgarrena gelditu zen taldeak Gascan erakutsi zuen lehengon (25-30) jokuz oraingo Bera Bera baino gehiago dela. Asteazkenean 19etan, La Rochellen bertako Aunis Handball taldea izango du aurrean, bigarren mailakoa eta han jokatu zuten Zulai Agirre eta Patricia Aisak, bestek beste.
Eta Celles sur Belle herriko txapelketan, ostiralean 18etan bigarren mailako Tours hiriko Chambray izango da aurkaria finalerdian. Eta larunbatean Nantes Loire Atlantique edo bertako Celles sur Belle, hau ere bigarren mailako taldea. Puchek plantilla osoa eraman du Frantziara, Tania Yáñez –lanean dago- eta Maialen Múgica –errehabilitazioan jarraitzen du- izan ezik. Olatz Ramon, Eider Lizarbe eta Maialen Husillos gazteak senior taldearekin bat egingo dute. Hortaz, exijentzia handiko jardunaldiak izango dira, bost egunetan lau partida jokatuko dituelako eta horrez gain entrenaldi saioak ere prestatu dira.

13 Abuztua 2015

Bera Berak galdu egin du gaur arratsaldean Nantes Loire Atlantique (25-30) taldearen aurka aurredenboraldiko lehen lagunartekoan, Josean Gasca kiroldegian jokatu dena. Bretainiako taldeak nabarian ageri du egun gehiago daramala lanean, partidako bi zatietako azken minutuetan aprobetxatu duena berau poltsikoratuz. Montse Pucheren aurreneko zazpikotean iazko jokalariak. Temprano atepean, Arrojeria zuzentzen, Menéndez eta Martínez alboetan, Ederra pibotean eta Ezkurdia eta Pinedo hegaletan. Donostiarrak fin hasi ziren erasoan, 4-2 aurreneko partzialean baina Nantesek segituan berdindu zuen (10. nin, 6-6). Pucheren jokalarientzat lehen lagunartekoa zen eta bretonentzako, hirugarrena, bezperan Zuazo gainditu zuten Barakaldon (19-24). Partidak intentsitatea zuen baina Bera Berak ez zuen defentsa sendo, erasoan Martínez fin zegoen, aldiz (10-9). Múgica lesionaturik, Etxeberriari atsedena eman dio Puchek eta jokalari berriak sartu ditu: Ziarsolo, Alicia Fernández, Judith Sans, Zugarrondo eta gazteak. Nafarrak geldiketa onak egin ditu eta bere taldeak abantaila lortu du (20. min. 12-9). Baina frantziarrak esnatu dira eta 2-7 amaitu dute lehenengo zatia, atsedenaldira 14-16 aurretik iritsiz. Bigarrenean, tarteak mantendu ditu Nantesek eta ondo kudeatu. Defentsan nagusitu dira erasoen aurrean eta lehenengo zatian bezala, bretoiarrek azken minutuetan ireki zuten aldea, Bera Bera erasoen hutsuneak aprobetxatuz eta partida bereganatuz 2-5 partzialari esker. Hortaz, aurreneko lagunartekoa izateko froga ona, aurkariak egun gehiago daramazki lanean eta Bera Berako hiru jokalari berriak oraindik taldeari egokitu behar dira. Fitxa: Bera Bera 25 (14+11): Temprano, Ezkurdia (1), Martínez (7), Arrojeria (1), Ederra (1), Menéndez (4) eta Pinedo (3) –titular- Ziarsolo (3), Sans (2), Fernández (2), Yáñez, Lizarbe, Ramon, Husillos (1) eta Zugarrondo (o.a.) Nantes Loire Atlantique 30 (16+14): Callave, Coatanea (4), Godel (3), Prudhomme, Lovric (5), Escribano (2); Marchal, Schop; Stoilikovic (5), De la Breteche (7), Lignieres (4), Chesnzau, Abba, Soulard, Lovisson eta Ranikova Epaileak: Mikel Burguera eta Markel Garralda (Euskaldunak) Kanporatuak: Arrojeria, Martínez eta Ederra Bera Beratik eta Godel, Schop eta Lovric Nantesetik. Partzialak: 4-2, 6-6, 10-8, 12-9, 13-13, 14-16 –atsedenaldia- 18-20, 19-21, 21-23, 23-26, 23-28 eta 25-30

13 Abuztua 2015

Atzo Gascan aurrendenboraldirako lagunarteko sorta ireki ostean, Nantesen aurka 25-30 galdu zuena, Bera Berak bihar Barakaldora egingo du bidaia Lasesarren Prosetecnisa Zuazoren aurka jokatzeko 19etatik aurrera.
Pucheren jokalarientzat bigarren lagunartekoa izango da eta horretarako deialdi bera errepikatuko du, Frantziara bidaia egin aurretik. Abuztuaren 17an izango da eta bertan Maitane Etxeberriak bat egingo du taldearekin. Bera Berak Nantes Loire izango du berriro aurrean abuztuaren 18an Nantesen eta abuztuaren 21 eta 22an Celles sur Belle herriko txapelketan parte hartuko du, ostiralean Chambray taldea izango da aurkaria. Tours hiriko taldea Frantziako bigarren mailan dago, partida 18etan hasiko da eta hurrengo eguneko aurkaria Nantes vs Celles sur Belle partidatik aterako da.
Partida ostean itzuliko da Bera Bera Donostiara eta abuztuko azken astean Superkopako finala prestatuko du. Aldez aurretik, asteazkenean, Egiako txapelketan Aiala Zarautzekin jokatuko du azken lagunartekoan.