Mundiala dela eta ia bi hilabeteko etenaldia bete ostean, Bera Berak adina puntuekin zegoen BM Alcobendas gaztea hartu du Anna Punkoren bajarekin. Garaipen ostean, hirugarren postuan jarraitzen dute donostiarrek bigarrena puntu batera duelarik, Mar Saguntok 23-24 Alacanten irabazi baitu.
Partidak bi alde izan ditu. Hasiera ona eman ondoren (5-3), -Libe Altunari esker- segituan berdinketa lortu du BM Alconbendasek eta aurretik jartzea ere lortu dute madrildarrek (12-13) atsedenaldira iristeko bost minutu falta zirela. Halere, Bea Fernandezek behin baino gehiagotan asmatu egin du eta Bera Berak markagailuari buelta eman dio 16-14.
Reyes Carrerek Anna Punkoren baja garrantzitsuarekin ekin dio partidari, Eider Rubiok –bigarren zati bikaina egin du- errusiarraren lekua bete egin du eta Vero Cuña zentral postuan aritu da. Anita Campak ezker hegalean hasi du partida -15. Minutan Bea Fernandez sartu da- eta defentsan Eli Pinedok ordezkatzen duen serbiarra.
Donostiarrek arazaoak zituzten Mireia Gonzalez eusten eta erasoan, batetik, baloi ugari galdu dituzte eta, bestetik, Carvalho piboteari ez dizkiote asistentzia onak eman. Bigarren zatia ikusgarria izan da, nahiz eta Mireia Gonzalezen golak 16-15 ezarri.
Lehenengo hamar minutuko partziala 7-2 izan da Bera Berarentzat, defentsan bikain aritu ostean eta BM Alcobendasen akatsak baliatuz. Madrildarrek ez dituzte donostiarren kanporaketak aprobetxatu. Aitzitik, Bera Berak korrika egiten asmatu egin du eta Eider Rubio bikain aritu da. Zortzi gol sartzea gain, baloiak lapurtu ditu, asistentzia ugari banatu eta madrildarren defentsan zuloak aurkitu.
Darly Zoqbi atezaina ere oso fin aritu da. Aipatzekoa da Reyes Carrere entrenatzaileak jokalari guztien artean banatu dituela minutuak, berak nahi duen jokurako beharrezkoa dena eta taldeak aste gutxitan partida ugari jokatuko dituelako.
Ondorioz, Mar Saguntoren ondo-ondoan jarraitzen du Bera Berak. Horrez gain, datu estadistikoak apurtu ditu, hau da, ez zuela partidarik irabazi 30 minututan 14 gol jasota eta, bestetik, partida osoan 24 gol baino gehiago jasoz gero, asko sufritzen duela. Gaur, 40 minutu bakarrik.
Partida hasi baino lehen, Bera Bera Eskubaloi taldeko Amaia Ramirezek Mundialean aritu diren Pinedo, Carvalho eta Menari opariak ema dizkie eta brontzezko domina lortu duen Eli Pinedori txapela jarri dio. Bera Berako jokalari ohia Ciobanuk ere zaletuen txaloak jaso ditu. Partida ikusten Jorge Dueñas Espainiako hautatzailea izan da, omenaldia ikusi ez duena norgehiagoka hasita sartu delako Bidebietan.
Bera Bera 36 (16+20): Zoqbi, Altuna (3), Pinedo (3), Rubio (8), Carvalho (5), Cuña (2), Ziarsolo (5) –titularrak- Yamiley (a.s.), Campa (2), Bea Fernández (5), Mena, Berta (3) eta Menéndez.
BM Alcobendas 25 (14+11): Ciobanu, Ferrer (3), Morante (1), Arderius (7), Álvarez (3), López (5), González (6), García, Prieto, Carrera (a.s.) , Sainer eta Navas.
Epaileak: Jorge eta Jesús Escudero (Kantabria) Kanporaketak: Rubio, Carvalho, Pinedo eta Bea Fernández Bera Beratik eta Morante eta Álvarez BM Alcobendas taldetik.
Partzialak: 2-1, 5-4, 8-8, 9-10, 12-12, 16-14 –atsedenaldia- 19-16, 23-16, 27-18, 30-21, 32-23 eta 36-25.
Bestetik, kadete mailako bi taldeek Zarauzko kiroldegian jokatuko dituzte partidak igandean. Bera Bera Egia kadete 1 taldeak Bartolo Jatetxea ZKE izango du zain goizeko 10etan eta 11,30etatik aurrera Bera Bera Egia kadete 2 eta Aiala ZKE taldeen txanda izango da.
Azkenik, Bera Bera Egia Infantil A taldeak larunbatean jokatuko du Eraintza C taldearen aurka bertan behera gelditu zen norgehiagoka, Bidebietan eguardiko 12,20an.
Komunikabideei zuzendutako adierazpenetan Reyes Carrerek madrildarrak izan ditu hizpide. “Guk ditugun zenbaki antzekoak dituzte, bataz beste 22 gol baino gehiago jasotzen dituzte eta 29 sartu, guk bezala, alegia” aipatu du Reyesek. “Alcobendas etxetik kanpo emaitza onak ateratzen ditu eta duela bi urtetik ona bere maila hobetu egindu –azaldu du- Ciobanuren fitxaketak taldearen maila igo du atean eta ezin ahaztu behar ligako goleatzailerik nagusiena datorrela, Marta López, hain zuzen”.
Halere, Reyes baikor da eta Anna Punkoren baja izan arren taldeak maila ona emango duela uste du. “Larunbatean bi hilabete hauetan egindako lana agerian azalduko da, oso gustora gaude egindako lanarekin lagunarteko ugari jokatu ditugulako, defentsan indartsu izaten jarraitzen dugulako eta orain, kontraerasoan sakondu nahi dugu gure jokoarekin arerioengan min gehiago sortze aldera” adierazi du.
Ligan eman den etenaldiaz galdetuta, “ez direla egun errazak” esan du hasperen eginez. “Taldean motibazioak sortzen saiatu gara, horrek esan nahi du partidak jokatu behar ditugula eta horrela izan da, mutilen aurka ere bai, hauen kontra adiago egotea behartzen gaituztelako eta, orokorroean, gure jokoa hobetzen saiatu gara” adierazi du Reyesek.
Bederatzi partida sorta
Azaldu duenez, Bera Bera Eskubaloiak “sei astetan bederatzi partida sorta bati egingo dio aurre”. Epe honetan, Reyes Carrerek “Kopako sailkapena argituko da” ohartarazi du, hori dela eta azpimarratu du “lehenengo itzuli amaieran bigarrenak gelditzea oso garrantzitsua izango litzateke Kopako zozketan zerrenda-buru gisa sartuko ginatekeelako eta, era berean, sailkapeneko goiko aldean finkatu”.
Datozen astetan, Bera Berak BM Alconbendas –larunbatean- eta Elda Prestigio (urtarrilaren 18an) jasoko ditu, Kanarietarra (urtarrilaren 14ean) eta Murtziara (urtarrilaren 21ean) egingo ditu bidaiak “oso plaza zailak direnak”. Partida sorta hau Itxakoren aurkako norgehiagokarekin eta, batez ere, Lada Togliatti errusiarraren aurkako kanporaketarekin amaituko da otsailaren hasieran.
“Oso erakargarriak dira, garrantzitsuak eta datorren hilabetean ere horrelako partida sorta nahiko genituzke” eskatu du entrenatzaileak.
Fisikoki “ondo” ikusten ditu jokalariak Reyes Carrerek, Eider Rubio eta Verónica Cuña azarorarte “minutu gehien jokatu dituztenak ere bai” eta Mundialean bukaeraino izan diren Eli Pinedo edo Dara Carvalho “ezin hobeto” ikusi dituela aitortu du.
Bere iritziz, BM Alcobendasen aurka “hobe da ahalik eta gol gutxien jasotzea, partida irabazteko aukera gehiago izango ditugulako, 24 gol baino gehiago jasoz gero sufritu egingo dugu” dio. Horregatik, “defentsan eraginkorrak izatea” eskatu du “erasoan golak sartuko ditugulako, ziur-ziur”.
Zentzu honetan, oso garrantzitsutzat jotzen du “ondo jokatzea, guretzako horrek esan nahi du defentsan maila altuena ematea, entrenaldietan jorratzen duguna betetzea eta taldea ausarta izatea, hau da, konfidantzaz gure jokuari heldu, joku azkarra eta bizkorra, alegia, eta eskarmentua duguen heinean arriskuak hartu, egoera horiek menperatzen ditugunez onartzeko prest gaudenak”.
Sanlo Eskubaloi Taldeak antolaturiko ikastaroen baitan antolatu da ekitaldia. 2002. urtean jaiotako neska mutileei zuzenduta, Olaizagako pistan burutzen ari dira saioak atzotik bihararte. Elgoibar, Deba eta Mendaroko gazteak bildu dira bertan.
Bi orduko entrenaldian Reyes Carrerek gozamenerako joku ezberdinak prestatu ditu, baloiarekin trebatzeko helburu eta, horrez gain, erritmo aldaketa, baloi lapurreta eta taldeko defentsa belalako kontzeptuak zabaldu nahi izan ditu.
Horrela, beroketzeko lasterketa batzu egin ostean, bildutako 30 neska-mutilek baloien jabe egin dira eta ariketekin gozatu ederra hartu ere bai. Hasteko, batzuk baloiei eutsi zioten bestek lapurtzen saitzen ziren bitartean, ondoren, lasterketa ezberdinak egin ostean gola sartzen ahalegintzen ziren. Bost jokalariez osatutako taldeen arteko norgehiagokeekin amaiatu da saioa.
Elgoibarko Sanlo EKTek antolaturiko jardunaldien asmoa da batetik, eskubaloia sustatzea egun eskola kirolean dabilen gazteriaren artean eta, bestetik, datorren denboraldiari begira alebin mailako taldeak indartu, batez ere, mutileena.
Bihar Jose Ignacio Altuberen txanda izango da, egun Ereintza taldeko prestatzaile teknikoa eta Euskadiko mutilen senior taldeko hautatzailea. Horrela amaituko da atzo Unai Arrieta Naturhouse Ciudad de Logroñon aritzen den jokalariak ireki zuen ikastaroa.
Ligaren itzuleran Bera Bera Eskubaloiak partida “zailak” ditu aurrez aurre, arerio zuzena horietako aurrena, larunbatean, BM Alcobendas –sailkapenean Bera Berarekin bat eginda dagoena- alegia. Darly Zoqbik argi du “irabazi beharreko norgehiagoka da”. “Beti hurrengo partida izango behar da helburu” dio brasildarrak, Itxako “gertuago” ikusten duena, “halere Liga ez dago gure esku, nafarrek partidarik ez baitute galdu”. Horregatik, “gure lana egitea” eskatzen du “bigarren postua lortzeko lehian buru-belarri sartu garelako”.
Bere esanetan, “partida guztiak dira zailak” eta oso garrantzitsua da “irabazteko presio handiagoa dugun Bidebietan punturik ez galtzea”. Hau da, “gure erritmoa ezarri behar dugu eta gure eskubaloia jokatu, defentsa ona eta kontraerasoak gauzatu” adierazi du.
Bera Bera da ligan gol gutxien jaso duen taldea. Darlyk ez du meritorik nahi “taldean egindako lanaren eraginez delako”. “Egia da, defentsan oso emaitza onak ditugu, moldaera azkarra izan da eta egunero indarguneak sendotzeko eta ahuleziak leuntzeko lan dexente egiten dugulako”.
Brasildarrak intentsitate handiz bizi ditu partida guztiak. Hala, Darlyren konzentrazio prozesuak bere taldekideak daramatenarekin ez du zer ikusirik. Halere ez du hortaz hitz egin nahi. “Norgehiagoka bakoitza desberdina da eta partida ahalik eta gehien bizitzea bilatzen dut”. Jokuan behin sartuta “defentsarekin lan egitea gustoko dut, asko hitz egin hobetzeko”.
Eta Darlyk arerioen jaurtiketak nahiz barneraketak gelditzeko behar duen inspirazioa aurkitzen du normalean. “Ohorezko mailako jokalariak jaurtiketa ezberdinak egiteko gai dira, ondorioz, partidan erabat sartuta egoten naiz eraginkortasuna lortzeko”.
Azkenenko partidan, Mar Saguntoren aurka, Darly bikain aritu zen. “Asko maite dut kluba hori eta niretzat partida berezia zen, ongietorri ona eman zidaten eta norgehiagokarekin pozik nago, talde bezala ere ondo ibili ginen hainbeste aldiz jokatu dudan pistan”.
Brasildarrak telebistaz jarraitu zuen eskubaloi Mundiala. “Txapelketa handia izan da eta Brasilek edozein taldea gainditzeko gai dela frogatu egin du” adierazi du. Bere ustez “Espainiak xehetasunak alde izan zituen, horrela galtzea tristea da nahiz eta Eli Pinedorekin poza hartu” dio hasperen eginez.
