Bera Bera - Berriak

08 Otsaila 2013

Bera Bera Eskubaloiko entrenatzaile Reyes Carrerek gaur goizean adierazi du bere taldea “aurrena partida irabazten saiatuko dela eta etxean jokatzen dugunez ehuneko ehuna eman gure publikoari errespetua zor diogulako”.
Komunikabideen aurrean izandako agerraldian Reyesek esan du “oinak lurrean ditugu”. Cup Winners’ Cupeko final-zortzirenetako itzuliko partidaz mintzatu da, non Bera Berak igandean 12,30etan Gaskan (epaileak: Daniel Freitas eta Cesar Carvalho (Portugal) Vistal Laczpol Gdynia hartuko du 32-20 kontrako emaiatzari aurre egiteko.
Izan ere, Poloniako txapeldunak birritan gainditu ditu donostiarrak aurtengo denboraldian. “Kanporaketa irauli dezakegun pentsatzea eta ehuneko ehuna eman behar dugula hasiera hasieratik arriskutsua da” ohartarazi du entrenatzaileak. Bere ustez, “partida irabazteko asmoarekin planteatu behar dugu eta hortik aurrera, gero gerokoak”.
Gainera aipatu du “horrelako zailtasun egoeretik gauza onak atera behar dira, beste partidei begira onuragarrak diren gauzak, alegia”.
Igandeko helburuaz galdetuta, Reyes Carrerek aipatu ditu bi “alde batetik, emaitzari dagokionez, partida irabazi eta, bestetik, jokuari dagokionez eraso jokoa hobetu eta guk eman dezakegun guztia eman dugula sensatzioa izan“. Era berean, “aurtengo denboraldiari begira ditugun beste helburuak ezin ditugu arriskuan jarri” aitortu du.
Jokalari guztiak, Vero Cuña izan ezik, prest ditu; halere, badira kolpeak eta mina ugari. Azkenik, Reyes Carrerek zalegoari “partida ikusteko” gonbitea luzatu egin dio “guk bakarrik ezin dugulako, ezta partida irabazi ere”.

Telebista eta internet
Norgehiagokoa ETBK SATek zuzenean emango du, www.eitb.net orrialdeak ere eskainiko du eta EHF TV web orrialdeak ere bai. Giroa berotzeko Lankorpek txalo egiteko tresnak egiten ditu gazteen artean banatuko direnak.
Partida ikusten instituzioetako ordezkari ugari elkartuko da. Besteak beste izango dira Donostiako alkate Juan Karlos Izagirre, Kiroletako zinegotzi Josu Ruiz, Eusko Jaurlaritzako Kiroletako Zuzendari Jon Redondo eta Gipuzkoako Foru Aldundiko Kiroletako Zuzendari Asier Sarriegi.

07 Otsaila 2013

Herrera ikastetxearen eskaerari erantzun zion atzo Bera Berak eta Verónica Cuña, Nagore Arizaga eta Nitsan Dunay jokalariak, harrobiko arduradun Verónica Valverde lagun, ikasleei eskubaloia erakusten aritu ziren . Saioan 10 eta 11 urte bitarteko 32 ikaslek parte hartu zuten. Unai Munduate irakasleak argi zuen “beste kirolak ezagutzera eman behar ditugu eta, batez ere, eskubaloia”. Mundialetan eta Joku Olinpikoetan lorturiko arrakastak eta Bera Beraren ibilbidearen esker, eskubaloia da mintzagai berriro ere. Ordu t’erdiko saioan, ikasleak baloiarekin asko aritu ziren, ariketa ezberdinak burutu zituzten eta, gustokoena, partidak jokatu. Unairen ustez “mutilek segituan aukeratzen dute kirola, gehienak futbola alegia, neskek, aldiz, ez dute taldekako kirola hain garbi”. Zentzu honetan, Verónica Valverdek astelehenero, 18,30etatik 19,30etara, 12 urte arteko gazteak biltzen duen taldearen berri eman zuen, kirola eta, batez ere, eskubaloiaren hastapenak lantzen dituena Bidebietan. Unaik berak aitortu zuen “horrelako saioak eraginkorrak dira, Bera Berako jokalariak zetozela jakitean futbola alde batera utzi eta aste honetan eskubaloiaz aritu dira”. Jarduera amaieran, segituan autografoen bila hasi dira ikastelak. Gainera Verónica Valverde Kukuxumusuk ateratako Bera Berako giltzariak ezezik, igandean Gaskan (12,30etan) Errekopako itzulerako partidarako sarrerak ere banatu zituen.

07 Otsaila 2013

Igandean Gaska kiroldegian (12,30etan, ETBK SAT) Vistal Laczpol Gdynia taldeak Bera Berari jarriko dizkion oztopoaz aparte balentria lortze aldera, donostiarrek historia ere kontra dute. Izan ere, 1993an debuta egin zuenetik, Bera Berak ezin izan du bi goleko desabantaila baino gehiago duen kanporaketa irauli Donostian. Horrela, Errekopan, donostiarren porrota handiena Europan eman zenetik 16 urte beteko dira bihar. Norvegiako Larvik taldeak 30-17 gainditu baitzuen Bera Bera eta itzuleko partidan 12-8 atsedenaldian irabazi arren 22-22 berdindu zuten donostiarrek. Hurrengo urtean, 1998ko azaroan, City Cup delakoan, Bera Berak 31-20 galdu zuen Nordstrand Oslo taldearen aurka (13-5 atsedenaldian) eta Donostian berriro ere galdu zuen (22-23). 2001eko urtarrilean, EHF Cup delakoan, 30-19 galdu zuen Danimarkan Randers taldearen aurka eta Donostian sorpresa emateko zorioan egon zen 30-21 irabazi baitzuen. 2004ko urtarrilean EHF Cupean, Prodaka Vegetak 34-27 gainditu zuen Bera Bera joanekoan Kroazian eta donostiarrek 32-31 irabazi zuten itzulikoan Donostian. 2007-08 denboraldiko Errekopa bizi-bizia izan zen. Suizako St. Otmar St. Gallen taldea aise gaindituta, Bera Berak Buducnostek hartutako bi goleko abantaila irauli egin zuen Donostian 33-27 (Esme López, 9 gol; Tati Garmendia eta Patri Pinedok, 7), atsedenaldian 15-16 galdu arren. Final-laurdenetan KIF Vejen daniarra izan zen aurkaria. Etxean 26-27 galdu arren etxetik kanpo 27-28 nagusitu zen Bera Bera eta, ondorioz, final-erdietarako lortu zuen txartela. Bidebietan 28-27 irabazi zion Errumaniako Brasov taldeari baina, itzuleran, apirilaren 26an, 39-30 galdu zuen. Eta iaz, otsailean ere bai, Errusiako Lada Togliatti 28-22 nagusitu zen EHF Cupeko joaneko partidan. Jendez gainezka zegoen Gaska kiroldegian Bera Berak 35-34 irabazi zion ostean lehiaketako txapeldunari, bigarren zati bikaina burutu ondoren. Zailtasunak zailtasun, Bera Bera erasoko jokoa hobetzen saiatuko da igandean, partida irabazteko aukera emango diona, aldagelan eta armailetan zapore ona uzteko eta, talde poloniarrari ezusteko handirik ematen baztertu gabe.

05 Otsaila 2013

Pasa den igandean Bidebietan balentria lortu zuen Bera Bera Egia Infantil Bi taldeak. Lehengo astean Usurbilen lorturiko berdinketa garrantzitsuak aukera guztiak irekita gelditu ziren azken jardunaldiari begira. Udarregi eta Bera Bera lidergoan bat eginda, gol average delakoa garrantzitsua zen. Usurbiltarrek 27 goleko abantaila zuten eta CDB Leizaran, sailkapenean hirugarrenari egin behar zioten bisita. Larunbateak jokaturik partidan 16-23 nagusi Usurbil.
Ondorioz, igande goizean Bidebietan irabazteaz gain erronka handiago zen, 35 goleko aldeko garaipena behar zuen Bera Berak eta horixe lortu! Bera Berak 39-4 irabazi zion CDB Leizaran B taldeari eta infantil mailako lehenengo faseko lehen multzoko txapelduna.
Bestetik, Egia Bera Bera senior mailako taldeak berriro garaipena lortu zuen, oraingo honetan sufritu behar izan zuen Urnieta London School gainditzeko (20-23). Bi jardunaldi falta direla lidergoan dira eta puntu bateko aldea du Elgoibargo Tecnifuelle taldearen aurka.
Infantil mailako beste taldea, Bera Bera Egia Bat 25-4 nagusitu zen Urnieta Guria Kafetegia taldearen aurka eta zazpigarren amaitu du ligan.

Euskal Ligan
Hurrengo faserako txartela lortuta, Estatala jokatzeko aukera emango duena, Bera Bera Egia jubenil taldeak Errenterian garaipena eskuratu zuen (14-26) Ereintza Aguaplast taldearen aurka. Bera Bera Egia kadete taldeak, berriz, Bidebietan berdindu zuen Astigarraga Gys Sport Elgoibar taldearen aurka.
Azkenik, Foru Aldundia txapelketan Bera Bera Egia kadete 2 taldeak eta Ereintza Beisser hemeretzina berdindu zuten Bidebietan.

03 Otsaila 2013

Otsaileako aurreneko bi asteetan liga alde batera utzita, Bera Berak gustoko duen Europako lehiaketa bati helduko dio gaur, Cup Winners’ Cup, hain zuzen, Poloniako txapeldun Vistal Laczpol Gdynia aurkari ezaguna aurrean duelarik. Izan ere, Champions Leagueko debuta apala egin zuen Bera Berak talde honen aurka. Viborgen (Danimarka) 22-31 emaitzak mina egin zuen eta donostiarren erreferentzia da baliabideak hobetze aldera, aurrean indargune ugari dituen taldea egon arren. Gaur arratsaldean (17etan) Gdyniako Hall of Sport and Show erabilera askotariko pabeiloian Bera Berak partida fisikoa nahi du eta baloi errazak ez galtzen saiatuko da Koniuszaniec eta, batez ere, Championseko fasean zazpi gol sartu zituen Sulzycka alboko jokalarien kontraerasoak saihesteko. Halere, ez da Reyes Carrere eta Martin Larrañaga entrenatzaileen kezka bakarra. Poloniarren aurreneko lerroak Duran jokalaria berreskuratu du eta kalitate handiko jokalariak ditu, Mateescu, Natasha Krnic eta Ana Pretrinja ezagunak eta Andrzejewska. Eta Kulwinska pibotea da, indartsua eta asko mugitzen dena, zaindu beharreko beste baliabidea. Bera Bera ordu t’erdiz entrenatu zen atzo arratsaldean final-zortzirenetako joaneko partida burutuko den ondoko pista batean. Albiste onak dira Eli Pinedok ez zuela minik sentitu atzo eta Antonio Liberalen lanari esker Nitsan Dunayren orkatila hobeto dagoela, israeldarrak jokatzeko aukera gutxi izan arren. Bera Berako 13 jokalariek pilates egin dute gaur goizean hotelean, Reyes Carrerek Vistal Laczpol taldearen indarguneak gogorarazi ditu eta 13etan bazkalduko dute donostiarrek, 17etatik aurrera faboritoak diren poloniarrak gelditzeko prest daudenak, Championseko errebantxa suposatzen duen kanporaketan.