Bera Bera Eskubaloiak Euskadiko Kopa 2014 eskuratu du gaur egurdian Zumarragako Ispilla kiroldegian Kukullaga Etxebarri 23-19 gaindituz (15-7 atsedenaldian).
Finalerdietan Zuazo eta Aiala mendean hartu ostean, gipuzkoarrak eta bizkaiatarrak iazko finala errepikatu dute. Orduan Kukullaga izan zen garaile, halere gaur lesionaturik aparte prest ziren jokalariekin aritu dira donostiarrak. Imanol Álvarez eta Lidia Montes entrenatzaileek 5-1 defentsa ezarri dute Arrojeria eta Azaola aurreraturik.
Gipuzkoarren aldetik, eserlekuan gelditu dira hasieran atzo ia partida osoa jokatu zuen Alba Menéndez eta María Núñez. Kontraerasoan Pinedo, Ezkurdia –berriro eskuin hegalean- eta Ziarsolok sartutako golek lehenengo abantaila eman diete Bera Berari baina Jessica Nogalesen bitartez partidari heldu nahi zion Kukullagak.
Bera Berak joku geldian arazoak zituenez, baloia lapurtuz korrika egin nahi zuen. Zati erdian Núñez, Menéndez eta Arizaga atera dira Ederra, Arrojeria eta Ziarsolo ordezkatuz. Defentsa 6-0 pasatu da, Kukullagari Elizegiren bitartez bi gol sartu dituela ordu laurden batean. Aitzitik, gipuzkoarrek Núñez pibotean hiru aldiz aurkitu dute atsedenaldian 15-7 ezarriz.
Bigarren zatian, Bera Berak aukerak eman dizkio Kukullagari baina bizkaitarrek une erabakiorretan huts egin dute. Elorza, Núñez eta Pinedo eserita –ez du bigarren zatian jokatu-Maria hegaleko jokalariak hiru gol sartu ditu eta Elizegi eta Nogales lagunduta 19-15 gerturatu dira. Imanol Álvarez 6-0 defentsara itzuli da Elorza eta Núñezekin baina erasoan donostiarrek ez dute asmatu.
Azkonaren gol batek Kukullaga hiru goletara utzi du (20-17) 10 minutu falta zirela. Halere, hiru aldiz topatu dira zutainarekin, Castaños pibotean eta Nogales zein Elizegik penaltietan. Eta aitzitik, Ziarsolok eta Elorzak ez dute barkatu.
Euskadiko Kopa berriro Donostian da eta taldeak buruan du datorren larunbatean, urtarrilak 11, Bidebietan 19etan Helvetia Alcobendas, bigarren sailkatuaren aurkako partida.
Fitxa: Bera Bera 23, Kukullag Etxebarri 19
Bera Bera 23 (15+8): Temprano, Ezkurdia (2), Elorza (3, 1p), Ederra (1), Arrojeria (1), Pinedo (5, 1p) eta Ziarsolo (4) –titular- Núñez (3), Menéndez (2) eta Arizaga (2p). Deialdian, Olatz Ramón eta María Akuña (o.a.).
Kukullaga Etxebarri 19 (7+12): Leire García, Maria (4), Azkona (4), Nogales (4, 1p), Elizegi (4), Sánchez eta Azaola –titular- Castaños (1), Agirregomezkorta, Gómez (1), González (1), Bilbao, Vales eta Urrutia (o.a.).
Epaileak: Javier Gude eta Juanjo Gude (Euskaldunak).
Kanporatuak: Menéndez, Arizaga (2) eta Ziarsolo Bera Beratik eta Azkona, Maria, Nogales (2), eta Sánchez Kukullagatik.
Partzialak: 4-2, 6-3, 9-5, 11-5, 13-6, 15-7 –atsedenaldian- 15-10, 19-13, 19-15, 20-17, 22-17 eta 23-19.
Bera Berak bukatu zuen bezala hasi du urtea. Euskadiko Kopako bigarren finalerdian, Zumarragako Ispilla kiroldegian burutu direnak, gipuzkoarrek aise mendean hartu dute Prosetecnisa Zuazo Barakaldo (19-32) eta bihar (11,30etan) leku berean Kukullaga Etxebarri izango dute aurrean finalean, bizkaitarrek Aiala Zarautz (36-26) gainditu baitute.
Pistan jokalari ezkertiarrik gabe, Maitane Etxeberria Asturiasen baitago Euskadirekin, Imanol Álvarez entrenatzaileak eskuin hegala Uxue Ezkurdiari eman dio lehenengo zatian eta bigarrenean Matxalen Ziarsolok hainbat minutu egin ditu bertan. Egiako jokalariak ondo baino hobeto aprobetxatu ditu Ana Tempranok bidalitako baloiak, bikain aritu baita asturiarra atepean eta, batez ere, pase luzeak bidaltzen.
Bera Berak 5-1 ezarri du defentsan Eli Pinedo aurreratuz eta Elorza, Menéndez eta Arrojeria lehenengo lerroan. Elorzaren barneraketak medio –lau gol- bizkaitarren defentsa apurtu du Bera Berak (2-7, min 11) Juan Carlos Solarren hutsartea eraginez.
Arizagak atsedena eman dio Elorzari baina Zuazok ezin izan ditu Tempranok zabaltzen zituen kontraerasoak gelditu, Ezkurdiak eta Pinedok ondo gauzatu dituztenak. Atsedenaldian, 9-18.
Bigarren zatian, kontraerasoak hizpide, Pinedo birritan, Menéndez, Arizaga eta Ederrak bide azkarra erabili dute hasi eta berehala. 41 minutuan etotri da joku geldian lehenengo gola, pibote nafarrak baselin ttukun batekin lortu duena. Ana Tempranok fin jarraitzen zuen eta Pinedok lekua aurkitu du ezkerrez baloia sarera bidaliz.
Ondorioz, aise lorturiko garaipena, minutuen banaketa nabarmena, Olatz Ramón eta María Akuña ere izan dira; 5-1eko defentsak emaitza onak eman ditu eta erasoan hainbat egoera frogatu dira ezkertiar jokalaririk gabe aritzeak dakarren gabezia saihesteko. Bihar 11,30etan, azken norgehiagoka.
Fitxa: Prosetecnisa Zuazo Barakaldo 19 – Bera Bera 32
Prosetecnisa Zuazo Barakaldo 19 (9+10): Fernández, Etxabe, Bonilla, A. Gil (2, 1p), Álvarez (2), Cobo eta O. Gil (3) –titular- Yañez (5, 2p), Ahedo (3), Hernández (3), Aldekoa, Galarza, Nagore (1) eta Esteban (o.a.).
Bera Bera 32 (18+14): Temprano, Ezkurdia (3), Elorza (5), Menéndez (3), Núñez (1), Arrojeria (3, 1p) eta Pinedo (8, 1p) –titular- Arizaga (5, 2p), Ederra (2), Ziarsolo (2), Ramón eta Akuña (o.a.).
Epaileak: Ramiro eta Mendizabal (Euskaldunak).
Kanporatuak: Etxabe (2), O. Gil, Cobo eta Nagore Zuazotik eta Pinedo, Elorza (2), Menéndez eta Ramón Bera Beratik
Partzialak: 1-2, 2-6, 4-11, 7-13, 8-16, 9-18 –atsedenaldia- 10-21, 12-23, 12-26, 14-28, 16-30 eta 19-32.
Urola Kirol Elkarteak, Urretxu eta Zumarragako udalek lagunduta, Zumarragan burutuko den Euskal Kopako bigarren finalerdia izango da.
Ispilla kiroldegiak hiru norgehiagokak hartuko ditu. Aiala Zarautz eta Kukullaga Etxebarri (16,30) taldeak irekiko dute Euskal Kopa eta horren ostean, donostiarrek Prosetecnisa Zuazo Barakaldo izango dute aurrean (18,30). Zarauztarrak izan ezik zilarrezko mailan daudena, gainontzekoak ohorrezko mailako taldeak dira.
Bera Bera atzo itzuli zen entrenaldietara eta prest diren jokalari guztiak elkartu zituen, horien artean Eli Pinedo eta Patricia Elorza. Internazionalak azaroaren 23an taldea utzi zuten Serbiako Mundiala prestatu eta jokatzeko.
Ondorioz, Euskal Kopa oso baliagarria izango da taldea berriro ere elkartzeko, Adriana Castroren bajari aurre egiteko eta Ligara ahalik eta ondoen itzultzeko behar den prestakuntzari heltzeko. Gipuzkoarrak líder dira partida guztiak irabazita.
Urola Kirol Elkarteak antolaturik, Urretxu eta Zumarragako udalen laguntzarekin, Zumarragako Ispilla kiroldegian burutuko da urtarrilarren 4 eta 5ean emakumeen eskubaloiko 2014ko Euskal kopa Aiala Zarautz, Kukullaga Etxebarri, Zuazo Barakaldo eta Bera Bera taldeen partaidetzarekin.
Gaur eguardian Zelai Arizti kultur etxean aurkeztu da txapelketa Zumarraga eta Urretxuko alkateak bertan zirela, Mikel Serrano eta Oihane Zabaleta; Euskal eskubaloi federazioko presidente José Manuel Ruiz de Cenzano; Urola K.E. eskubaloi arloko presidente Jon Mendia eta Bera Bera ordezkatzen, bigarren entrenatzaile Martin Larrañaga.
Horrela, larunbatean 16,30etan lehenengo final-erdian izango dira Aiala Zarautz eta Kukullaga Etxebarri taldeak. Ostean, 18,30etan, Bera Bera eta Zuazo Barakaldoren txanda izango da. Irabazleek elkar ikusiko dute igandeko finalean, 11.30etan. Partida guztiak Zumarragako Ispilla kiroldegian ospatuko dira.
Aurkezpenean, Zumarragako alkate Mikel Serranok “udalentzako oinarrizko kirola sustateaz gain, emakumeen elite mailako euskal kirolara hartzeko” aukera azpimarratu du. Urretxuko alkate Oihane Zabaletak azpimarratu du “emakumeen kirolarako ereduzko kirolariak gertu izatea garrantzitsua da”. Bestetik, José Manuel Ruiz de Cenzanok eskertu die udalei izandako “inplilazioa” eta, era berean, berretsi du Federazioak egin duen “emakumeen eskubaloiren aldeko apustua” eta Jon Mendiak “publikoari ikuskizunaz gozatzeko” eskatu dio.
Bera Beraren izenean, bigarren entrenatzaile Martin Larrañagak, bi udalei eta Urola Kirol elkarteari Euskal Kopa antolatzeagatik eskertzeaz gain, txapelketaren garrantzia azpimarratu du, izan ere, “oso ondo etortzen zaigu taldea Ligarako prest jartzeko”. Urtarrilaren 11n Ligara itzuliko da Bera Bera sailkapenean bigarrena den Helvetia Alcobendasen aurka “eta Zumarragara prest diren jokalari guztiekin etorriko gara, horien artean duela bi aste jokatzerik izan ez zuen Matxalen Ziarsolo eta Eli Pinedo eta Patricia Elorza internazionalak”.
Argazkian: Martin Larrañaga, Ruiz de Cenzano, Serrano, Zabaleta eta Mendia.
Bera Bera aurreneko aldiz emakumeen eskubaloi Ligako txapelduna sortatu zen urtea badoa. 2013an Liga, Kopa eta Superkopa eskuratzeaz gain –denboraldi berean Gipuzkoan lehenengo aldiz- Europako goreneko txapelketan Champions Leagueko multzoen fasean debuta egin dute gipuzkoarrak.
Urte historikoa, zalantzarik gabe, Gipuzkoako Kirol Kazetarien Elkarteko urteko galan ez ezik Teledonosti nahiz Onda Ceroko ekitaldietan ere horrela adierazita gelditu izan da.
Aurten jokaturiko Ligako 26 partidatan, -12-13 denboraldiko 16 norgehiagoka eta egungo hamar- porrota bakarra jasan izan dute donostiarrek. Valentzian izan zen (25-23). Halere hurrengo sei partidak irabazi eta Castro Urdialesen eskuratu zuen Liga maiatzean.
Egungo denboraldian, gipuzkoarrek guztia irabazi dute estatuko txapelketatan. Irailaren 4ean Superkopa BM Rocasari eta Ligako hamar jardunaldiak, besteak beste, A Guardan eta Bidebietan Rocasa eta Elche gaindituz.
Bera Berak ere 2013ko Kopa bereganatu zuen sufritzen jakin izan zuelako. Otsailean A Guardan eta Porriñon ospatu zen txapelketan Zuazo luzapenean gainditu zuen, Elche Munstang taldearen aurkako partida irauli egin zuen eta gol bakar batez irabazi zion Rocasai finala.
Europan, iraulketa historikoa
Europako partaidetzaren inguruan, Cup Winners’ Cup txapelketan Bera Berak hamabi goleko desabantailari aurre egin zion Serbiako Mundialean Poloniarekin laugarren gelditu diren hainbat jokalari zituen Vistal Laczpol Gdynia taldea, alegia. Ondoren ezin izan zuen Alemaniako Thüringer taldeari aurre egin final-laurdenetan.
Champions League
Ligako txapeldun gisa, Bera Berak Champions Leagueko multzoen fasera lortu zuen txartela zuzena. Bertan Larvik azpitxapelduna, Mazedoniako Vardar indartsua eta Kroaziako Podravka Vegeta izan ziren aurkariak. Aurreneko partidan, Bera Berak Vardar estutu zuen, Serbiako selekzioko –azpitxapelduna- gidari den Lekic jokalariak ardura hartu zuen arte.
Debutariek horrelakoetan ordaindu behar duena ordaindu zuen Kroazian Bera Berak eta bederatzi goleko aldea erabakiorra izan zen. Norvegiarrak eta Mazedoniako taldeak gaindiezinak, kroaziarrak eta euskaldunak Cup Winners’ Cupera txartela jokoan izan zuten Gaskan. Bera Bera 28-19 nagusitu zen, balentria lortzeko hiru gol falta zirela. Halere, oso paper duina Bera Berarena Champions Leaguen, partida bat irabazi lortuz eta gol gutxien jasotzen, zortzigarren taldea.
Agurrak
Aurten Reyes Carrerek entrenatzeari eta Eider Rubio eta Libe Altuna jokatzeari utzi diete. Horrez gain, Frantziako Fleuryk Darly Zoqbi fitxatu zuen eta Bidebietara etorri dira Imanol Álvarez entrenatzailea, Ana Temprano atezaina eta lehenengo lerrorako, Ana Martínez. Emaitza, ezinhobea. Entrenatzaileak eta taldeak segituan elkar ulertu dute, Temprano oso denboraldi ona burutzen ari da eta bi hilabetetan Ana Martinezek kalitatearen berri eman du. Elxetarra esker bizkarra berreskuratzen lanean ari da.
Vero Cuña eta Yamiley Rodríguezen lesioek minutuak eman dizkie lau jokalariei, dagoeneko lehenengo taldean direnak. Esther Arrojeria eta Uxue Ezkurdiak aurreneko denboraldian minutuak izan zituzten eta aurten debuta egin duten Maitane Etxeberria (16 urte) eta María Akuña atezaina. Eskuin hegalak etorri galanta dauka (21 gol Ligan eta Larviken aurka, titular). Atezainak ondo baino hobeto erantzun zion egoera zail bati, Castelldefelsen Temprano ordezkatu behar izan zuen bigarren zati osoan markagailua berdintuta.
Azken agurra, tristea izan da. Abenduan, Adriana Castrok kontratua eten egin zuen senide arazo larriak direla eta.
2014: hasiera zaila
Iaz bezala, Bera Berak urteko hasiera gogorra izango du. Halere, egoera ezberdina da. Iaz, garai honetan, hirugarrena zen, Rocasa liderra bi puntuta zuen eta Elche puntu bakarrera. Halere, lehenengo itzulia buruan amaitu zuen Kanarietan irabazita eta Elchek Alcobendasen galduta.
Oraingo honetan, lider hartuko du –hiru puntuko aldea- Helvetia Alcobendas bigarren sailkapenean, Bidebietan urtarrilaren 11n Ligara itzuliko dena. Otsailaren 1ean Mecalia Guardes izango da Donostian eta bigarren asteburuan Kanarietara abiatuko da. Ligarako partida erabakiorrak izan daitezke.
Horretarako, urtarrilarren 2tik aurrera, baliabide urratuei ahalik eta etekin handiena ateratzen saiatuko dira Imanol Álvarez eta Martin Larrañaga entrenatzaileak. Aurredenboraldiko lehenengo egunean ziren Cuña, Yamiley, Nitsan, Ana Martínez eta Castro ez dira izango epe motzera. Horregatik, harrobiara helduko diote eta gaur amaituko den 2013. urtean bizitakoa berriro gozatzeko gogoak lagungarria izango da.
Oporretarako egun batzuk izan ostean, nahiz eta ariketa batzuk bete behar izan, urtarrilaren 2an itzuliko da taldea entrenaldietara. Eta bertan izango dira Eli Pinedo eta Patricia Elorza internazionalak, Serbia Mundialean izan ostean.
Azkenik, lerro hauen bitartez, Bera Berak 2014 urte zoriontsua opa nahi dizkie taldea gertutik bizi duenari.
