SUPER AMARA Bera Berak Elgoibarren antolatu duten Euskal Kopako edizio berri ekingo dio, bihar ostirala final erdiak jokatuko direlarik eta larunbatean 18etan, finala.
Olaizaga kiroldegiak hartuko ditu hiru norgehiagokak. Gipuzkoarrak 19,30etan Kukullaga Etxebarri izango dute aurrean, egun Zilarrezko mailan dagoen taldea. Lehenago 17,30etan Euskal Kopa inauguratuko dute HGB Prosetecnisa Zuazo eta San Adrian taldeak, azken honek Zilarrezko mailan jokatzen du non Bera Bera Eskubaloiak utzita, Ainhoa Etxeberria aritzen den.
Montse Puchek nobedade pozgarriak ditu. 14 jokalari eramango ditu Elgoibarrera, nahiz eta Arrojeria -sendagile agiria jasota- eta Zugarrondok minutu gutxi batzu baino ez dute jokatuko. Deialdian dira Maitane Etxeberria eta Silvia Arderíus internazionalak. Txapelketa honetan, SUPER AMARA Bera Berak urteari amaiera jarriko eta urtarrilaren 4ean Gijónen izango du lagunartekoa, bertako Mavi Nuevas Tecnologías taldearen aurka.
