Montse Puche entrenatzaileak SUPER AMARA Bera Berarekin duen lotura denboraldi amaieran amaituko du. Klubeko zuzendaritzak hitzarmena ez berritzea erabaki du ziklo berri bati hasiera emate aldera, halere, zinez eskertzen dio Pucheri egindako lana taldea zuzentzen hiru urte baino gehiago egondako denboran eta etorkizunean onena opa dio.
Montse Puche 2015eko martxoan iritsi zen Donostiara eta Elxen apirilaren 11n zuzuendu zuen bere lehenengo partida. Plantillari haize freskoa eman zion eta Bera Berak Liga irabazteko gai izan zen Telden 24. jardunaldian. Erabaki ausarta izan zen hura taldea lider zela eta Puche jokalari ohi bikaina izan zen baina entrenatzaile gisa ez zuen eskarmenturik elitean.
Hurrengo denboraldian (15-16) hiru tituluak lortu zituen, Superkopa Rocasari Gascan (18-17) eta Bera Berak ligan 18 partida jarraian irabazi behar izan zituen kanariarren aldea iraultzeko. Liga Bidebietan irabazi zuen Ziarsoloren agurrean. Aurretik O Porriñon lortu zuen Kopa Prosetecnisa Zuazo Barakaldo finalean (33-17) gaindituz.
2016-17 denboraldian Superkopa irabazi zion Zuazori; Txapeldunen Ligako atarikoa jokatu zuen eta EHF Cupean Frantziako Brest taldeak kanporatu zituen donostiarrak. Ligan, SUPER AMARA Bera Berak Valladoliden baino ez zuen hutsik egin baina martxoan Arrojeria eta Alicia Fernández jokalarien lesio larriak jasan zituen. Kopako finala luzapenean galdu zuen Rocasarekin eta Ligan azpitxapeldun izan zen taldea.
Egungo denboraldian, SUPER AMARA Bera Bera atzetik hasi zen Rocasarekin Bidebietan galdu ostean, oraindik erabat osaturik ez baitzegoen taldea. EHFn Turkiako Kastamonu taldeak kanporatu zuen etxetik kanpo bi partidak jokatuta eta Kopako finala galdu zuen Xixongo Mavi Nuevas Tecnologías taldearen aurka. Egun bere esku du Guerreras Iberdrola Liga, joku irregularra egin arren etxetik kanpo garaipen ederrak lortu ditu bigarren itzulian. SUPER AMARA Bera Berak Elche Mustang hartuko du larunbatean Bidebietan eta Ligari Barakaldon jarriko dio amaiera.
Guztiagatik, Bera Bera Eskubaloiak eskertzen eta azpimarratzen du Montse Puchek egindako lana denboraldi hauetan. Halere, ziklo berri bat hasteko beharra ikusten du Gipuzkoako emakumezkoen eskubaloiko eta Guerreras Iberdrola Ligako erreferentzia izaten jarraitzeko. Elitezko kirolean egunero hartu behar dira erabakiak eta kasu askotan etorkizuneko ikuspegia da nagusi.
