Loterías Ligan azpitxapeldun izanda, SUPER AMARA Bera Berak 2017-18ko EHF Cupean eman du izena, Europako bigarren lehiaketa garrantzitsuena iaz Cup Winners’ Cupekin bat egin zuena.
Donostiarrentzat 22. denboraldia da Europan lehiatzen, izan ere, ohorezko mailara igo zenetik bakarrik hiru alditan ez dute lortu sailkapena. Bera Berak 82 norgehiagoka jokatu ditu Europan eta salto bat ematea du helburu, oso zaila izan arren, EHF Cupeko multzoen fasean aritze aldera. Horretarako hiru kanporaketa gainditu beharko ditu aurten, Txapeldunen ligako atarikoan izena eman duten taldeak besteak beste izan daitezke aurkari urrian edo azaroan.
Europako federazioak rakina kontuan hartuta taldeen banaketa egin ostean, Vienan uztailaren 18an egingo du zozketa. Aurreneko kanporaketa irailaren 9-10 eta 16-17an jokatuko da; bigarrena, urriaren 14-15 eta 21-22an eta hirugarrena, azaroaren 11-12 eta 18-19an. Multzoen fasea lau taldez osaturiko lau multzo izango ditu, hau da, sei partidatako ligaxka 2018ko urtarrilaren 6an hasiko dena.
Txapeldunen ligan 22 talde onartu dituztenez -16 arituko dira multzoen fasean urrutik-, EHFk Liga goreneko talde asko hartuko ditu, besteak beste, Danimarka, Hungaria, Errusia, Norvegia, Errumania, Alemania eta Frantziako hiruna talde, Holanda, Serbia, Txekia, Eslovakia, Ukrainia, Italia edo Suizako txapelduak, besteak beste. Esate baterako, Frantziako Bessançon, Issy Paris eta Dijon taldeak izango dira bertan.
