Harrobiko taldeek bi partida baino ez dute asteburu honetan. Larunbatean Bidebietan, 18,15etan, Bera Berak Replasa Beti Onak hartuko du. Oso partida erakargarria da eta giro aparta espero da. Nafarrak donostiarrak baino koxka bat aurretik dira sailkapenean, hirugarrenak alegia, Bera Berak baino hiru puntu gehiagorekin. Bi partido besterik ez ditu galdu, Colores liderra eta Kukullagarekin. Bestetik, Loyola gainditzen lehen taldea izan da. Guerreras Iberdrola ligan aritu diren jokalariak ditu: Retegi, Zalgizuri eta Arrasate, besteak beste.
Bera Berak Sinfín gainditu zuen Bidebietan azken jardunaldian eta burutu duen lehen itzulia borobildu nahi du etxean larunbatean.
Bestetik, Gipuzkoako txapelketan kadete taldeak Zumaiak jokatuko du igandean 13etan.
