Kilometroak 2016 egitasmoaren aldeko lagunartekoa jokatuko dute asteazkenean, abuztuaren 31n, Super Amara Bera Berak eta Aiala Zarautz taldeek. Labegaraieta kiroldegian izango da norgehiagoka 19etatik aurrera.
Gaur goizean Aranzadi ikastolan partidaren aurkezpena egin dute Kilometroak 2016ko Ekaitz Aranberri koordinatzailea, Bergara Eskubaloi taldeko Josetxo Muniategik eta Super Amara Bera Berako Alba Menéndez kapitainak eta Aiala Zarautz taldeko Nerea Arregi eta Nora Kortaberriak.
Lehiaketa ofiziala hasi aurretik azken lagunartekoa izango du Super Amara Bera Berak, larunbatean Iruñako Anaitasuna kiroldegian, 18,15etan, Superkopa jokoan izango baitu Prosetecnisa Zuazo Barakaldoren aurrean.
Rioko Joku Olinpikoetan parte hartu ostean, gaur Super Amara Bera Berarekin bat egingo dute Patri Elorza eta Marta López jokalariek. Hortaz, aurredenboraldia hasi zela duela hilabete bat pasa ostean Montse Puche entrenatzaileak aurreneko aldiz plantilla osoarekin lan egingo du. Aurten gizonezkoek eta emakumezkoek bat egin duten Superkopa ostean, Donostiako Gasca kiroldegian irailaren 9 eta 10ean jokatuko den Champions Leagueko atarikoa prestatuko du Super Amara Bera Berak.
Select your language
