“Zaletuen babesarekin eta gozatzen kanporaketa irauli dezakegu”

Bost goleko desabantaila iraultzea duen zailtasunaz jabe da baina Bera Berako entrenatzaile Montse Puche eskubaloian dagoen sinismen bati heldu dio “kanporaketa bat ez dago galduta tartea zazpi golekoa baino gutxiago bada”.
EHFko hirugarren txandari dagokion joaneko partidan, Eslovakian ospatu zena lehengo igandean, Bera Berak porrota jaso zuen Iuventa Michalovce taldearen aurrean (34-29). Pucheren ustez “partida kontrolpean izan genuen baina taldeak ondo jokatu arren, azken minutuetan ihes egin ziguten eslovakiarrek, bakarrik jaurtiketetan kale egin genuen”. Horregatik dio bere jokalariek “guztia emango dute igandean Gaskan”. Partida 12etan izango da (ETB1), Maria Bennani eta Safia Bennani suediarrek zuzenduko dutena eta delegatua Joao Costa portugaldarra izango da.
Bere ustez, igandean Bera Berak pistara “disfrutatzera irten behar du, oso garrantzitsua da, bost goleko zama daramagu baina taldea arin baldin badago, gozatzen, lasai eta bost gol horiek kudeatzen aukera handiak ditugu”.
Era berean, Puchek zalegoei dei berezi bat bidali die. “Etxean jokatzen dugula nabaritu behar dugu. Eslovakian presio handia izan zen eta zaletuak ohiu ugari eta hori nahi dugu Gaskan, horregatik gonbitea luzatu nahi dut iganderako”. “Ziurtzat dute –jarraitzen du entrenatzaileak- eskubaloiarekin gozatuko dutela, taldeak guztia emango duela eta jendea goza araziko dugu Europako lehiaketa batean gainera”.
Aurkariaz galdetuta, hasteko “bere flair play eza” salatu du, izan ere, partida telebistaz zuzenean eskaini arren “ez digute bideorik eman”. Iuventa Michalovce taldeaz adierazi du “guk espero genuena egin zuen, halere, partidan ginen eta azken jaurtiketetan ez genuen asmatu eta hor ireki zen aldea baina Bera Bera hobea espero dut igandean”. Eslovakiarren jokuaz “kanpoko jaurtiketa” da bere kezka nagusiena, “bederatzi metroetatik haratago”, halere, astean zehar egingo duten lanarekin eta zalegoen babesarekin kanporaketa gainditzeko aukerak ikusten ditu Montse Puchek.
Bera Bera gaur arratsaldean entrenatuko da Bidebietan, bihar Gaskan; Iuventa Michalovce aldiz ostiral gauean iritsiko da eta larunbat arratsaldez entrenatuko da.