Martxoaren 7tik ligako lau partida jokatu ostean, Bera Berak Bidebietan hartuko du Valladolideko Aula Cultural taldea (Soria eta Iniesta, Valentzia) 21. jardunaldiari dagokion partidan. Maiatzaren 30era arte sei norgehiagoka jarraian izango dituzte donostiarrek, Rocasarekiko bi puntuko aldea dituztenak eta Mecalia Atlético Guardéseki, bost, azken jardunaldian A Guardan galdu baitzuten kanariarren aurka.
Montse Puche lehenengo aldiz eseriko da Bidebietan, partida ofizialean. Harmailetan ikusi zuen Castelldefelsen aurkako norgehiagoka eta Tati Garmendiari lagundu zion Alcobendasen nahiz Zarautzen Canyamelar Valenciaren aurrean. Elxen, berriz, taldea berak zuzendu zuen, Elche Mustang (16-25) aise gaindituz.
Etenaldiek balio izan zaie taldeari erasoko jokoa lantzeko, lesionaturik zirenak hobetzeko eta taldearekin lanean jartzeko, guztiak Maialen Múgica izan ezik, jakina. Plantilla, halere, etenaldirik gabe ligarako gelditzen diren sei partidei heltzeko irrikan dago.
Gaur arratsaldeko entrenaldiaren faltan, Puchek jokalari guztiak izango ditu prest. Gaurko saioa arinago izango da Donibane senior mailako mutilen aurkako lagunartekoan intentsitate handiz aritu baitzen taldea. Puchek minutuak banatu zituen eta Tempranok bakarrik jokatu zituen 60 minutuak, pasaitarren atezaina ordezkatu baitzuen lehenengo zati aimaieran Akiles tendoian mina hartuta.
Hortaz, nobedadeak Maite Zugarrondo eta Amaia Azanza nafarrak izango dira, eskuin sorbalda eta txorkatila hobetuta.
Partida ohi baino ordubete lehenago izango da, 18etan, ondoren Easori Bidebietan partida jokatzeko aukera utziz. Ondorioz, Bera Berak Valladolideko Aula Cultural hartuko du bihar, Rocasari puntu bat urratzeko zorian egon zen taldea eta azken jardunaldian Zuazori egindako 47 golekin denboraldiko marka finkatu zuena. Egun sailkapenean seigarrena den talde honen indargunea eraso jokoa da eta zentzu honetan Alicia Fernández eta Amaia González de Garibay dira jokalaririk aipagarrienak.
Pasaiako Ontziola jatetxeari esker, atsedenaldian bi pertsonentzako otordua zozketatuko da, maiatzean kadete taldeak sektorea jokatzeko laguntzeko.
Select your language
